काठमाडौ । सेयर बजार ५ प्रतिशतले बढेपछि मंगलबारका लागि कारोबार रोक्का भएको छ । नेपाल स्टक एक्सचेन्जका अनुसार नेप्से सूचक ५.०१ प्रतिशतले बढेको छ । समग्रमा नेप्से ७६.७९ विन्दुले बढेर १६१०.६२ विन्दुमा आइपुगेको हो ।
दुई बज्दासमम्म नेप्सेमा १४४ कम्पनीको एक अर्ब ३९ करोड रुपैयाँभन्दा बढीको कारोबार भएको छ । २५ लाख ९८ हजार ५५७ कित्ता सेयर किनबेच भएको हो । सुरुमा ३ प्रतिशतले बजार बढेपछि १५ मिनेटका लागि कारोबार रोकिएको थियो ।
दुई बजे आसपासमा फेरि बजार ५ प्रतिशतले बढेपछि दिनभरका लागि कारोबार स्थगित गरिएको हो । मंगलबार तीन पटक सर्किट ब्रेकर लागेको हो । बजार ५ प्रतिशतले बढेमा दिनभर नै कारोबार स्थगित हुने प्रावधान छ । स्थानीय निकाय निर्वाचन हुने आशमा बजारमा उछाल आएको हो । चुनाव भएमा बजारमा पैसा आउने र त्यो पैसा सेयर बजारमा जाने लगानीकर्तामा विश्वास देखिएको छ ।
प्रकाशित मितिः २०७३ चैत १५
वि.सं.२०७३ चैत १५ मंगलवार १७:३४ मा प्रकाशित
