काठमाण्डौं । नेपाल धितोपत्र बोर्डले सेयरको प्राथिमक निस्कासन (आइपिओ)मा आवेदन दिँदा फोटो र नागरिकताको फोटोकपी नचाहिने व्यवस्था गरेको छ । गत माघ देखि आइपिओमा आवेदन दिन डिम्याट खाता अनिवार्य गरिएको हुँदा फोटो र नागरिकताको फोटोकपी नचाहिने बोर्डले जनाएको हो।
लगानीकर्तालाई सहज बनाउन ल्याइएको यो प्रावधान आगामी निस्कासनहरुबाटै कार्यान्वयनमा आउने समेत बोर्डले जनाएको छ। त्यस्तै, हालै सञ्चालनमा ल्याइएको आश्वा प्रणालीबाट आवेदन गर्दा समेत डिम्याट खाता अनिवार्य रहेको कारण फोटो र नागरिकता आवश्यक नपर्ने बोर्डले जनाएको छ। डिम्याट खाता खोल्दा नै लगानीकर्ता पहिचानको सम्पुर्ण जानकारी लिइने हुँदा प्रत्येक निस्कासनमा फोटो र नागरिकता नचाहिने बोर्डले निश्कर्ष निकालेको छ।
आयोजना या उद्योग प्रभावित क्षेत्रका लागि निकालिएको सेयर आवेदन गर्दा भने डिम्याट खाता जरुरी छैन । त्यसैले उनीहरुले भने आवेदन दिँदा फोटो र नागरिकताको प्रतिलिपि राख्नु पर्ने बोर्डले जनाएको छ।
१८ चैत २०७३, १०।००
वि.सं.२०७३ चैत १८ शुक्रवार १०:२८ मा प्रकाशित