काठमाडौँ । कङ्गोको कसाई क्षेत्रमा रहेका झण्डै चार लाख बालबालिकाहरू हिंसाको उच्च जोखिममा रहेको पाइएको छ ।
महिनौदेखिको हिंसा चलिरहेकाले लाखौँ मानिस भोकमरीको शिकार हुने खतरा पनि रहेको युनिसेफले बुधबार जनाएको छ ।
संयुक्त राष्ट्रसङ्घको बालबालिकासम्बन्धी निकाय युनिसेफले हिंसा चलिरहेका ठाँउमा रहेकाहरूका लागि खानेकुरा, औषधिलगायतका अत्यावश्यक सामग्रीहरू पनि पठाउन नसकिएको जनाएको छ ।
“जारी सङ्कटले झन्डै चार लाख बालबालिकालाई कुपोषणको शिकार बनाउने भएको छ,” युनिसेफद्वारा जारी विज्ञप्तिमा भनिएको छ, “यसको अर्थ यो होकी तत्काल केही व्यवस्थापन नगरिए उनीहरूको मृत्यु पनि हुन सक्दछ ।”
ती बालबालिकालाई जोगाउनका लागि तत्काल चार करोड २० लाख अमेरिकी डलर आवश्यक रहेको पनि युनिसेफले विज्ञप्तिमा उल्लेख गरेको छ ।
“कुनै औषधि, कुनै खानेकुरा र पिउने पानी विना सयौँ हजारौँ बालबालिका खतरामा रहेका छन्,” विज्ञप्तिमा लेखिएको छ ।
कङ्गोमा केही महिनादेखि सरकारी सुरक्षा फौज र विद्रोही लडाकूका बीचमा भिडन्त भइरहेको छ । हिंसाका कारण लाखौँ जनता प्रत्यक्ष पीडित भएका छन् । एजेन्सी
वि.सं.२०७४ जेठ ११ बिहीवार ०९:५८ मा प्रकाशित