काठमाडौ । बहुराष्ट्रिय कम्पनी युनिलिभर नेपाल लिमिटेड गतबर्षको कमाईबाट ११ सय प्रतिशत अर्थात प्रतिकित्ता सेयर एक हजार एक सय रुपैयाँ नगद लाभांश वितरण गर्ने प्रस्ताव गरेको छ । साथै कम्पनीले आफ्नो २५ औ बार्षिक उत्सवको अवसरमा प्रतिकित्ता थप एक सय ७० रुपैयाँ विशेष लाभांश समेत वितरण गर्ने प्रस्ताव गरेको कम्पनीले जनाएको छ ।
अघिल्लो बर्ष कम्पनीले एक हजार २० प्रतिशत अर्थात प्रतिकित्ता सेयर बराबर एक हजार २० रुपैयाँ नगद लाभांश वितरण गरेको थियो । हाल यो कम्पनीको दोस्रो बजारमा प्रतिकित्ता सेयरमूल्य ३० हजार एक सय रुपैयाँ रहेको छ ।
कम्पनीको गत अर्थिक वर्ष ०७३/०७४ मा खुदनाफा घटेको छ । गत आवमा युनिलिभरले ९६ करोड ५२ लाख रुपैयाँ मात्र खुदनाफा गरेको छ । अघिल्लो वर्षको सोही अवधिमा उसको नाफा १ अर्ब १२ करोड १७ लाख रुपैयाँ थियो । अघिल्लो आवको तुलनमा युनिलिभरको नाफा करिब १६ करोड रुपैयाँ घटेको हो ।
कम्पनीले मंगलबार गत आवको वित्तीय विवरण सार्वजनिक गरी नाफामा कमी आएको जानकारी गराएको छ । गत आवमा बिक्रीबाट हुने आम्दानी झण्डै ६० करोड रुपैयाँ बढेको छ ।
गत आवमा युनिलिभरले ५ अर्ब १ करोड ८१ लाख रुपैयाँ आम्दानी गरेको थियो । अघिल्लो आवमा उसको आम्दानी ४ अर्ब ४० करोड ५३ लाख रुपैयाँ थियो । नाफा कम भएपछि युनिलिभरको प्रतिसेयर आम्दानी घटेर ३३१ रुपैयाँमा सिमित भएको छ । अघिल्लो वर्ष यस्तो आम्दानी ४८२ रुपैयाँ थियो । गत वर्ष युनिलिभरको सेयर मूल्य प्रतिकित्ता ३० हजार १७० रुपैयाँसम्म पुगेको थियो ।
प्रकाशित मितिः२०७४ भदौ १३
वि.सं.२०७४ भदौ १३ मंगलवार १२:५६ मा प्रकाशित
