कावासोती । नेपाली काँग्रेसका महामन्त्री एवं नवलपरासी क्षेत्र नं. १ का सांसद डा. शसांक कोइरालाको निर्देशनमा देवचुली नगरपालिकाका कार्यकारी अधिकृत मन्त्रालय तानिएका छन् । दशैं अगाडि संघीय मामिला तथा स्थानीय विकास मन्त्रालयले सरुवा गरेर देवचुली पठाएको कार्यकारी अधिकृत चिरिञ्जीवी गिरीलाई कार्यालयमा हाजिर भएको दुई घण्टामै मन्त्रालय हाजिर हुने ब्यहोराको पत्र फ्याक्स मार्फत पठाइएको छ ।
निर्वाचनका बेला आफ्नो निर्वाचन क्षेत्रमा आफूअनुकलका कार्यकारी अधिकृत हुनुपर्ने भन्दै लविङ्ग गरेका कोइरालाले देवचुली र गैंडाकोट कार्यकारी अधिकृतमा सरुवा भएर गएकै कर्मचारीलाई फिर्ता गरेका हुन् । सोमबार हाजिर भएका कार्यकारी अधिकृत गिरीलाई सोमबारै मन्त्रालय तानिएको हो । कोइरालाले संघीय मामिला तथा स्थानीय विकास मन्त्री बिजय गच्छदारलाई दवाव दिदै पुरानै कार्यकारी अधिकृत मानबहादुर खड्कालाई देवचुली पठाएका हुन् । सरुवा भएपछि शसांकका पिएले अधिकृत गिरीलाई भेट्न बोलाएको तर गिरी नगएपछि उनीहरुको डिजाइनमा कोइरालाले मन्त्रालय तान्न दवाव दिएको खुलासा भएको हो ।
जिल्ला समन्वय समिति नवलपरासीले नन्दीजन्य पदार्थको अबैध उत्खनन गरेको भन्दै काँग्रेस महासमिति सदस्य बिष्णुबहादुर कार्की संलग्न स्मृति निर्माण सेवालाई कारबाही थालेपछि नवलपरासीका तत्कालिन स्थानीय विकास अधिकारी जीवलाल भुसाल र त्यसपछि आएका स्थानीय विकास अधिकृत युवराज कट्टेललाई सरुवा गर्न काँग्रेस सभापति तथा प्रधानमन्त्री शेरबहादुर देउवा दवाव दिएपछि उनीहरुको पनि कार्यालयमा हाजिर भएको एक महिनामै सरुवा हुनु परेको थियो । काँग्रेस नेताहरुको स्थानीय कर्मचारीमा देखिएको नाङ्गो हस्तक्षेप अन्त्य हुन नसक्दा जिल्लाको विकासको गति समेत प्रभावित बन्ने गरेको छ ।
प्रकाशित मितिः२०७४ असोज २६
वि.सं.२०७४ असोज २६ बिहीवार १८:०८ मा प्रकाशित
