काठमाडौ । सिचाइँ मन्त्री सञ्जयकुमार गौतमले प्राकृतिक प्रकोपका कारण पनि विकासले सोचेजति गति लिन नसकेको बताएका छन् । नेपाल भौगर्भिक समाजद्धारा अन्तर्राष्ट्रिय प्रकोप न्यूनीकरण दिवसमा आयोजना गरेको कार्यशालामा मन्त्री गौतमले भूकम्प, भूक्षय, बाढी, पहिरो, हिमतालजस्ता प्राकृतिक प्रकोपको हिसाबले अति नै जोखिम रहेकाले विकासको काममा सहजता नभएको बताए ।
उनले नेपालमै रहेको स्रोत साधनको प्रयोग गर्दै अनुसन्धानमूलक तरिकाबाट विकासको काम अघि बढाउनुपर्नेमा पनि जोड दिए । कार्यक्रममा पुनःनिर्माण प्राधिकरणका कार्यकारी अधिकृत प्रा डा गोविन्दराज पोखरेलले प्राकृतिक प्रकोपबाट हुने क्षतिलाई न्यूनीकरण गर्न वैज्ञानिक तरिकाले विकासको काम अघि बढाउनुका साथै एकीकृत बस्तीलाई जोड दिनुपर्ने धारणा राखे । राष्ट्रपति चुरे तराई मधेश संरक्षक समितिका अध्यक्ष डा वीरेन्द्रकुमार यादवले मुलुकमा सबैभन्दा पछि परेको स्थान चुरे रहेको भए पनि राज्यको ध्यान कम परेकाले बजेट पनि अत्यन्तै कम छुट्याइने गरेको गुनासो गरे ।
नेपाल भौगर्भिक समाजका उपाध्यक्ष गणेश त्रिपाठीले मानिसको लापर्बाहीका कारण पहाडको वनजंगल फँडानी हुने, तराईको उर्बर भूमिमा बालुवा आउने क्रम तीव्र रहेको हुँदा यसले झन प्राकृतिक विपत्तिलाई बढाएकाले राज्यले विशेष ध्यान दिनुपर्नेमा जोड दिए । रासस
प्रकाशित मितिः २०७४ साउन २७
वि.सं.२०७४ असोज २७ शुक्रवार १३:५३ मा प्रकाशित
