काठमाडौ । बैङ्कहरु भविष्य मुल्यांकन नगरी कर्जा प्रवाह गर्दा लगानीयोग्य रकमको बजारमा अभाव देखिएको छ । बचत संकलनमा गिरावट आउदा बैङ्हरुले निक्षेपको ब्याज बढाउन थालेका छन् । लगानी योग्य रकमको अभाव भएको भन्दै बैंक तथा वित्तीय संस्थाहरुमा मुद्दती निक्षेपको ब्याजदर बढाउने प्रतिस्पर्धा चलेपछि यसको प्रभाव सेयर बजारमा देखिन थालेको छ ।
यता नेपाल राष्ट्र बैंकले समेत कर्जा प्रवाहमा सावधानी अपनाउन बैंक तथा वित्तीय संस्थालाई निर्देशन दिएपछि सेयरबजारको गिरावट झन गहिरीएको छ । धमाधम निक्षेपको ब्याजदर बढाउने प्रतिस्पर्धामा उत्रिएका बैंकहरुले अर्कातर्फ कर्जाको ब्याजदर समेत बढाउन थालेको छन् ।
चालु आर्थिक वर्षको कात्तिकसम्म सेयर कर्जा साढे ५ प्रतिशत बढेर ४२ अर्ब ६९ करोड रुपैयाँ पुगेको छ । ४ महिनामा बैंक तथा वित्तीय संस्थाले २ अर्ब २१ करोड ५२ लाख रुपैयाँ सेयरमा लगानी गरेको नेपाल राष्ट्र बैंकले जनाएको छ ।
बैंकहरुले सेयर कर्जाको ब्याज दर बढाएर १५ प्रतिशतसम्म पुर्याएका छन् । बजार घटिरहेको बेलामा सेयर कर्जाको ब्याजदर समेत बढ्न थालेपछि यसको प्रत्यक्ष असर सेयर बजारमा परेको लगानीकर्ता तथा ब्रोकरहरुको भनाई छ ।
बैंकहरुले ठूला ठूला विज्ञापन गरेर १२ प्रतिशतसम्म ब्याजदरमा मुद्धती निक्षेप उठाउन थालेका छन् । अर्कातर्फ नयाँ सरकार कहिले गठन हुने भन्ने राजनीतिक अन्योलताले समेत बजारलाई अस्थिरतता तर्फ धकेलेको छ । यता राष्ट्र बैंकले भने बजारमा ३३ अर्ब रुपैयाँ बराबरको तरलता रहेको बताउँदै आएको छ ।
२०७४ पुष ११ गते प्रकाशित
वि.सं.२०७४ पुस ११ मंगलवार १६:३४ मा प्रकाशित
