काठमाडौ । चालु आर्थिक बर्षको मंसिर मसान्तसम्म नेपाल स्टक एक्सचेन्ज लिमिटेडमा सूचीकृत शेयरहरूको चुक्ता मूल्य वार्षिक बिन्दुगत आधारमा ३३.६ प्रतिशतले वृद्धि भई ३०९ अर्ब ३६ करोड पुगेको छ । आर्थिक वर्ष २०७४,७५ को पहिलो ५ महिनामा सेयरबजारमा कुल ६० अर्ब ६१ करोड रुपैयाँ बराबरको थप धितोपत्र सूचीकृत भएको छ । राष्ट्र बैंकका अनुसार यस अवधिमा साधारण, बोनस, हकप्रद सेयर तथा सरकारी ऋणपत्रको गरी उक्त परिमाणको धितोपत्र सूचिकृत भएको राष्ट्र बैंकले जनाएको छ ।
यसअवधिमा नेप्सेमा सूचीकृत कम्पनीहरूको संख्या १९४ मा झरेको छ । अघिल्लो मंसिरमा नेप्सेमा सूचिकृत कम्पनीको संख्या २२१ थियो । केही बैंक तथा वित्तीय संस्थाहरू एक आपसमा मर्ज भएका कारण सूचीकृत कम्पनीहरूको संख्या घट्न गएको हो ।
सूचीकृत कम्पनीहरूमध्ये १४८ वटा बैंक तथा वित्तीय संस्था (बीमा कम्पनी समेत) रहेका छन् भने १८ वटा उत्पादन र प्रशोधन उद्योग, १७ वटा जलविद्युत् कम्पनी, ४र४ वटा होटल तथा व्यापारिक संस्था र ३ वटा अन्य समूहका रहेका छन्।
राष्ट्र बैंकका अनुसार मंसिर मसान्तसम्ममा १ अर्ब ५६ करोड बराबरको साधारण शेयर, २१ अर्ब ८ करोड बराबरको हकप्रद शेयर, २ अर्ब ८३ करोड बराबरको बोनस शेयर र ३५ अर्ब १४ करोड बराबरको सरकारी ऋणपत्र गरी कुल ६० अर्ब ६१ करोड बराबरको थप धितोपत्र सूचीकृत भएका छन् ।
२०७४ मंसिरमा १० अर्ब ६५ करोड बराबरको सेयर कारोबार भएको छ । जून अघिल्लो मंसिरको तुलनामा ४३।५ प्रतिशतले कम हो । २०७३ मंसिरमा १८ अर्ब ८३ करोड बराबरको सेयर कारोबार भएको थियो ।
आर्थिक वर्ष २०७४ को कुल गार्हस्थ्य उत्पादनसँग समीक्षा अवधिको बजार पूँजीकरणको अनुपात ६८ प्रतिशत रहेको छ । अघिल्लो वर्ष यस्तो अनुपात ७५.८ प्रतिशत रहेको थियो।
२०७४ माघ ४ गते प्रकाशित
वि.सं.२०७४ माघ ४ बिहीवार १३:४२ मा प्रकाशित
