काठमाडौ । सेयर बजार परिसूचक नेप्सेमा यस साता १०८.१६ अंकको सुधार आउँदा कारोबार रकम गत साताको भन्दा ३८.४६ प्रतिशतले बढेको छ । गत साता दुई अर्ब ९५ करोड २९ लाख ८९ हजार रुपैयाँको सेयर कारोबार भएकोमा यस साता चार अर्ब आठ करोड ८७ लाख ५७ हजार रुपैयाँको कारोबार भएको हो ।
यस साता नेपाल स्टक एक्सचेन्जमा १८१ कम्पनीहरुको ८८ लाख ५९ हजार ४१० कित्ता खरिद विक्री भएको छ । गत साता गत साता १८३ कम्पनीहरुको ८१ लाख ९८ हजार ९०० कित्ता सेयर कारोबार भएको थियो ।
साताको नेप्से परिसूचक पहिलो दिन आइतबारको तुलनामा १०८.१६ अंकले बढेर अन्तिम दिन विहीबार १३८८.३१ अंकमा पुगेको छ । ‘क’ वर्गका कम्पनीहरुको कारोबार मापन गर्ने सेन्सेटिभ परिसूचक पहिलो दिनको तुलनामा २१.०५ अंकले बढेर २९४.०३ अंकमा बढेको छ ।
यस साता कारोबारको आधारमा लगानीकर्ताको रोजाइमा सूर्या लाइफ इन्स्योरेन्स कम्पनी परेको छ । कम्पनीको १२ करोड ४२ लाख रुपैयाँ बराबरको सेयर किनबेच भयो । त्यसैगरि कुमारी बैंकको ११ करोड, युनाइटेड इन्स्योरेन्स कम्पनीको १० करोड एक लाख, चिलिमे हाइड्रोपावर कम्पनीको ९ करोड ८९ लाख तथा नेपाल बैंकको ९ करोड २२ लाख रुपैयाँ बराबरको सेयर कारोबार भयो ।
नियमित कारोबारका लागि पाँच दिन खुला रहेको नेपाल स्टक एक्सचेञ्जमा यस साता संस्थागत तथा सरकारी ऋणपत्रहरुको कुनै पनि कारोबार भएन ।कारोबार भएको सेयर संख्याको आधारमा कुमारी बैंक लिमिटेड अग्रस्थानमा रह्यो । बैंकको चार लाख २४ हजार कित्ता सेयर खरिदविक्री भएको छ भने कारोबार संख्याको आधारमा प्रिमियर इन्स्योरेन्स कम्पनी एक हजार ७९७ कारोबार गर्दे अग्रस्थानमा परेको छ ।
२०७५ बैशाख ८ गते प्रकाशित
वि.सं.२०७५ वैशाख ८ शनिवार १९:२८ मा प्रकाशित
