काठमाडौं । आजभोली बिभिन्न सरकारी, संस्थान, निजी क्षेत्रका ठूला कार्यालय, सेयर खरिद बिक्रीका लागि जम्मा हुने ठाउँ सेयर ब्रोकरको कार्यालयदेखि चिया पसलमा समेत बैंक तथा वित्तीय संस्थाले वाँडने लाभांशको चर्चा हुने गरेको छ । गत आर्थिक वर्षमा कमाएको पैसा लाभांशको रुपमा लगानीकर्ता (सेयरधनी)लाई वितरण गर्ने समय आएकाले लगानीकर्ताहरु माझ चर्चाले बढी ठाउँ पाएको हो । गत आर्थिक वर्षभरी कमाएको नाफाबाट उनीहरुले सेयरधनीलाई लाभांश वितरण गर्ने गर्छन् । बैंक तथा वित्तीय संस्थाहरु पनि लाभांश घोषणा गर्ने तयारीमा जुटेका छन् । केहीले लाभांश घोषणा गरिसकेका छन् धेरैले भने घोषणा गर्न बाँकी छ ।
वाणिज्य बैंकहरुले पनि लाभांश घोषणा गर्ने तयारीमा जुटेका छन् । यसअघि सबैभन्दा छिटो लाभाशं घोषणा गर्दै आएको सिटिजन्स बैंकले एक साता भित्रै लाभांश घोषणा गर्ने तयारीमा जुटेको बैंक स्रोतको भनाइ छ । गत वर्षको कमाइ र यसअघिको कोषमा भएको रकमबाट १५ देखि २० प्रतिशत लाभांश दिन सकिने बैंकको भनाइ छ । तर, त्यसमध्ये कति वोनस र कति नगद लाभांश दिने भन्ने सम्वन्धमा सञ्चालक समितिले निर्णय गरिसकेको छैन् । सम्भवत यही साता बस्ने बैठकले निर्णय गर्ने बैंक स्रोतको भनाइ छ ।
यसैगरी सानिमा बैंकले पनि सिटिजन्स बैंकको हाराहारीमा लाभांश दिने तयारी गरेको छ । तर, बोर्ड बैठक बसिनसकेकाले टुंगोमा पुगि नसकेको बैंकको भनाइ छ । निजी क्षेत्रबाट सबैभन्दा बढी नाफा कमाएको नबिल बैंकले पनि लाभांश घोषणा गर्ने तयारी गरेको छ । तर, उसले कति लाभांश दिने भन्ने बारेमा मुख खोलेको छैन् । गत वर्षहरुमा केही बैंकले दसै तिहार अघि नै साधारणसभा गर्ने र त्यस्तो साधारणसभाले पारित गरेको लाभांश वितरण गर्दै आएका थिए । अहिले पनि करिव एक दर्जन बैंक तथा वित्तीय संस्थले दसै र तिहार अघि नै लाभाश वितरण गर्ने तयारीमा छन् ।
अहिलेसम्म २८ वाणिज्य बैंकले सेयरधनीलाई यति वा उत्ती दिने भनेर लाभाशं घोषणा गरिनसकेपनि विकास बैंक, फाइनान्स कम्पनी, लघुवित्त, बिमालगायतका कम्पनीले धमाधम घोषणा गरिसकेका छन् । शाइन रेसुड.गा डेभलपमेन्ट बैंकले १८ प्रतिशत बोनस सेयर र त्यसमा लाग्ने कर प्रयोजनका लागि ०.९५ प्रतिशत दिने घोषणा गरेको छ ।
यसैगरी महालक्ष्मी विकास बैंकले १५ प्रतिशत लाभांश दिने घोषणा गरेको छ । महालक्ष्मीले ८ प्रतिशत वोनस सेयर र ७ प्रतिशत नगद लाभांश दिने घोषणा सञ्चालक समितिले गरेको हो । यसैगरी हाम्रो विकास बैंकले पनि १०.३१ प्रतिशत लाभांश दिने घोषणा गरेको छ । उसले पनि २.४० प्रतिशत वोनस सेयर र ७.९१ प्रतिशत नगद लाभांश दिने घोषणा गरेको हो । राष्ट्र बैंकले भने आर्थिक वर्ष समाप्त भएको ६ महिनाभित्र साधारणसभा गर्नु पर्ने व्यवस्था गरेको छ । प्रायः सबैले त्यसअघि नै बैंक तथा वित्तीय संस्थाले साधारणसभा गर्ने गर्छन् ।
२०७५ भदौ १७ गते प्रकाशित
वि.सं.२०७५ भदौ १७ आइतवार १०:१७ मा प्रकाशित
