काठमाडौं । नेपाल राष्ट्र बैंकले सेयर बजार सुधारका लागि नयाँ व्यवस्था गरेसँगै सेयर उकालो लागेको छ । हिजो ३० अकंले बढेको नेप्से आज पनि बढने अपेक्षा गरिएको छ । केन्द्रीय बैंकले आधार गणना गर्ने विधिमा पनि परिवर्तन गरेको छ । यसले ०.७५ प्रतिशत बिन्दुसम्म ऋणको ब्याजदर घट्ने अनुमान गरिएको छ । राष्ट्र बैंक बैंक तथलो वित्तीय संस्थालाई सेयर धितोमा मूल्यको ६५ प्रतिशतसम्म ऋण दिन पाउने व्यवस्था गरेको छ । यसअघि सेयर धितोमा मूल्यको ५० प्रतिशत मात्र ऋण दिन पाउने व्यवस्था थियो ।
यसअघि सेयर बजार सुधार गर्न अर्थमन्त्री युवराज खतिवडाले केन्द्रीय बैंकका डेपुटी गभर्नर शिवराज श्रेष्ठको संयोजकत्वमा समिति गठन गरेका थिए । सोही समितिले दिएको सुझाव प्रतिवेदनका आधारमा केन्द्रीय बैंकले नयाँ परिपत्र जारी गर्दै नयाँ व्यवस्था गरेको हो ।
यसैगरी, सूचीकृत नभएका हकप्रद तथा बोनस सेयरलाई समेत हिसाब गरेर मार्जिन कल गर्न सकिने व्यवस्था गरिएको छ । यसले पनि लगानीकर्तालाई निकै ठूलो राहत मिल्ने अपेक्षा गरिएको छ । केन्द्रीय बैंकले बैंकलाई ब्रोकर लाइसेन्स दिने बाटो पनि प्रस्ट पारिदिएको छ । अब वाणिज्य बैंकहरुले सहायक कम्पनी खडा गरेर ब्रोकरको काम गर्न सक्नेछन् । यसैगरी, मार्जिन ट्रेडिङ प्रक्रिया पनि अघि बढ्ने स्पष्ट संकेत केन्द्रीय बैंकले गरिदिएको छ ।
राष्ट्र बैंकको नयाँ व्यवस्थाले लगानीकर्तालाई प्रोत्साहित गरेको छ । केन्द्रीय बैंकले यसअघि नै बैंक ब्याजदरमा अंकुश लगाइसकेको छ । केन्द्रीय बैंकले स्प्रेड दर घटाउन समेत बैंक तथा वित्तीय संस्थालाई निर्देशन दिएको छ । यसैगरी, सेयर कर्जा बैंक तथा वित्तीय संस्थाहरुले आफ्नो प्राथमिक पुँजीको बढीमा ४० प्रतिशतसम्म प्रवाह गर्न पाउने भएको छन् । यसअघि २५ प्रतिशतसम्म मात्र प्रवाह गर्न पाउँथे । समग्रमा केन्द्रीय बैंकको निर्णय पुँजी बजारमैत्री देखिएको र यसले सेयर बजार अझै बढ्ने अपेक्षा गरिएको छ ।
२०७५ पौष १२ गते प्रकाशित
वि.सं.२०७५ पुस १२ बिहीवार १०:१९ मा प्रकाशित
