काठमाण्डौ । ग्लोबल आइएमई बैंकले फागुन १५ गते आजदेखि ऋणपत्र खुला गरेको छ । बैंकले ‘१०.२५ प्रतिशत ग्लोबल आइएमई बैंक डिवेञ्चर–२०८०/८१’ निश्कासन गरेको हो ।
प्रतिकित्ता १००० दरले १५ लाख कित्ता ऋणपत्रमा छिटोमा फागुन १९ गते र ढिलोमा चैत १४ गतेभित्र आवेदन दिन सकिनेछ । कुल निश्कासित १५ लाख कित्तामध्ये ६ लाख कित्ता सर्वसाधारणका लागि, ३ हजार कित्ता म्युचुअल फण्डहरुका लागि र बाँकी कित्ता संस्थागत लगानीकर्ताका लागि छुट्याइएको छ ।
ऋणपत्रमा लगानीकर्ताले १०.२५ प्रतिशत वार्षिक ब्याज पाउनेछन् । ब्याजको भुक्तानी अर्धवार्षिक रुपमा हुनेछ । इच्छुक लगानीकर्ताले न्यूनतम २५ कित्तादेखि अधिकतम ७५ हजार कित्तासम्मका लागि आवेदन दिन सक्नेछन् । यसमा बिक्री प्रबन्धक एआइबिएल एस क्यापिटल रहेको छ । इच्छुक लगानीकर्ताले सीआस्वा सेवा संचालनको अनुमति पाएका बैंकमार्फत पनि आवेदन दिन सक्नेछन् ।
बैंकले पूँजी कोष वृद्धि गर्न, बैंकको प्रबन्धपत्रमा उललेख भएको उदेश्य प्राप्त गर्न तथा सेवा विस्तार गर्ने क्रममा लगानी बढाउन तथा वित्तीय एवं आर्थिक गतिविधिलाई विस्तार गर्नका लागि आवश्यक पूँजी जुटाउनका लागि ऋणपत्र जारी गरेको जनाएको छ । इक्रा नेपालले यो ऋणपत्रलाई ‘इक्रा एलए माइनस’को रेटिङ प्रदान गरेको छ, जसको अर्थ यसमा लगानी गर्नु कम जोखिम रहेको भन्ने हो ।
२०७५ फागुन १५ गते प्रकाशित
वि.सं.२०७५ फागुन १५ बुधवार १३:३२ मा प्रकाशित