काठमाडौं । पहिलो चरणको निर्धारित समयमा साउन १२ गतेसम्म म्युचुअल फन्ड नबिकेपछि एनआइसी एसिया ब्यालेन्स फन्डले आवेदन दिने समय लम्ब्याएको छ । एनआइसी एसिया ब्यालेन्स फन्डको १२ करोड ५० लाख इकाई म्युचुअल फन्ड भर्ने समय लम्ब्याइएको हो । भदौ ५ गतेसम्म आवेदन दिन सकिनेगरी समय थप गरिएको हो । यसलाई एनआइसी एसिया क्यापिटलले व्यवस्थापन गरेको छ ।
साउन ८ गते बाट ‘एनआइसी एसिया ब्यालेन्स फन्ड’ नाममा १२ करोड ५० लाख इकाई म्युचुअल फन्ड निष्कासन गरिएको हो । यसमध्ये सर्वसाधारणले १० करोड ६२ लाख ५० हजार इकाईका लागि आवेदन दिन सक्नेछन् । यस्तै, बिज पुँजी बापत १ करोड ७५ लाख इकाई कोष प्रवद्र्धक एनआइसी एसिया बैंक र १२ लाख इकाई कोष व्यवस्थापक एनआइसी एसिया क्यापिटललाई सुरक्षित गरिएको छ ।
सर्वसाधारणले प्रतिइकाई १० रुपैयाँका दरले न्यूनतम १०० इकाईदेखि अधिकतम १ करोड ७५ लाख इकाईसम्म आवेदन दिन सक्नेछन् । लगानीकर्ताले एनआइसी एसिया क्यापिटलको कार्यालय र सी–आस्वामार्फत आवेदन दिन सक्नेछन् । एनआइसी एसिया क्यापिटललको व्यवस्थापनमा सञ्चालन हुन लागेको यो दोस्रो म्युचुअल फन्ड हो । अहिले एनआइसी एसिया ग्रोथ फन्ड सञ्चालनमा छ ।
२०७६ साउन १३ गते प्रकाशित
वि.सं.२०७६ साउन १३ सोमवार १२:०० मा प्रकाशित