म्याग्दी । म्याग्दीको रघुगंगा गाउँपालिकाले बालविवाह न्यूनीकरण र बालिकाको शिक्षामा पहुँच बढाउन ‘छोरी पेवा बचत कार्यक्रम’ सुरु गरेको छ ।
मौवाफाँटस्थित गाउँपालिकाको कार्यालयमा बसेको कार्यपालिका बैठकले ‘रघुगंगा छोरी पेवा बचत कार्यक्रम सञ्चालन कार्यविधि’ पारित गर्दै २२ गते बुधबारदेखि जन्मने छोरीलाई मासिक एक सय रुपैयाँ दिने निर्णय गरेको हो ।
आठवटै वडामा गाउँपालिकाले तोकेको सहकारी संस्थामा छोरीका नाममा खाता खोलेर गाउँपालिका र अभिभावकले मासिक एक–एक सय रुपैयाँका दरले बचत गर्ने कार्यविधिमा उल्लेख छ ।
गाउँपालिकाले १० वर्षसम्म र अभिभावकले २० वर्षसम्म मासिक रूपमा खातामा जम्मा गर्ने पैसा छोरी २० वर्ष पुगेपछि मात्र निकाल्न पाउने व्यवस्था मिलाइने प्रमुख प्रशासकीय अधिकृत रमेश थापाले जानकारी दिए ।
बालिका १० वर्षदेखि २० वर्ष नपुग्दासम्म उनका अभिभावकले आफ्नो आम्दानीको ५ प्रतिशत रकम सो खातामा अनिवार्य रूपमा जम्मा गरिदिनुपर्ने प्रावधान राखिएको छ ।
बालिकाको खातामा जम्मा हुने रकम २० वर्षअघि शिक्षालगायत अत्यावश्यक कार्यका लागि निकाल्नुपरेमा गाउँपालिकाको स्वीकृति लिनुपर्ने बाध्यकारी व्यवस्था राखिएको छ ।
सर्त पालना नगरे खातामा अभिभावकले जम्मा गरेको पैसासमेत गाउँपालिकाले नै फिर्ता लिने जनाइएको छ । (नयाँ पत्रिका बाट)
२०७६ भदौ १ गते प्रकाशित
वि.सं.२०७६ भदौ १ आइतवार १३:५० मा प्रकाशित
