वासिङटन। अमेरिकी अर्थशास्त्रीले अमेरिकी राष्ट्रपति डोनल्ड ट्रम्पका कतिपय आर्थिक नीतिहरूका कारण सन् २०२१ को अन्त्यसम्म आर्थिक मन्दी हुने अनुमान गरेका छन ।
अमेरिकी व्यावसायिक अर्थशास्त्री संघले गरेको सर्वेक्षणमा ३४ प्रतिशत अर्थशास्त्रीले अर्थतन्त्रको मन्द वृद्धिले सन् २०२१ मा ठूलै आर्थिक मन्दी निम्तिने उल्लेख छ ।
गत फेब्रुअरीमा गरिएको यस्तै सर्वेक्षणमा २५ प्रतिशतले आर्थिक मन्दी आउने पूर्वानुमान गरेका थिए । सर्वेक्षणमा २ प्रतिशतले मात्र यसै वर्षदेखि मन्दी आउने बताएका थिए । करिब ३८ प्रतिशतले आर्थिक मन्दी सन २०२० मै शुरु हुने बताएका छन ।
बैंक अफ अमेरिका मेरिल लिन्चको सर्वेक्षणले यस्तो जानकारी दिएको हो। उक्त सर्वेक्षणमा ५ खर्ब ५३ अर्ब अमेरिकी डलर बराबरको व्यवस्थापन गर्दै आएका संस्थाका प्रमुख समेटिएका थिए ।
अर्थशास्त्रीहरूले राष्ट्रपति ट्रम्पले अघि सारेका करवृद्धिको योजना र उच्च बजेट घाटाले अन्ततः अर्थतन्त्रलाई नै नोक्सान गर्ने अनुमान गरेका छन ।
राष्ट्रपति ट्रम्पले अमेरिकाका प्रमुख व्यापारिक साझेदार मुलुकहरूबाट भित्रिने सामानमा कर बढाएका छन्। उनले चीन, यूरोपेली मुलुकहरू, मेक्सिको र क्यानडाबाट आउने सामानमा कर बढाएका छन ।
अमेरिकी अधिकारीहरूले आयातमा हुने करवृद्धिले व्यापारमा सहजता आउने विश्वास व्यक्त गरेका छन । यसबाट अमेरिकी व्यापारिक साझेदार मुलुक पनि असन्तुष्ट भएका छन्। उनीहरूले प्रतिशोध स्वरूप अमेरिकी सामानमा पनि करवृद्धि वा आयात नियन्त्रण गरेका छन ।
विश्वका सर्वा्धिक ठूला अर्थतन्त्र भएका देश अमेरिका र चीनबीचको व्यापारमा नाटकीय रूपमा कमी आएको छ। राष्ट्रपति ट्रम्पले करिब ३ खर्ब अमेरिकी डलर बराबरका चिनियाँ सामानमाथि पछिल्लो पटक घोषणा गरेको १० प्रतिशत करवृद्धिको प्रस्तावलाई आगामी डिसेम्बर १५ सम्मका लागि स्थगन गरेका छन ।
सर्वेक्षणमा अमेरिका–चीन बीचको व्यापार सम्झौता सफल हुनेमा धेरैजसो अर्थशास्त्रीले आशंका व्यक्त गरेका छन्। करिब ५ प्रतिशत अर्थशास्त्रीले मात्र व्यापार वार्ता सफल हुने अनुमान गरेका छन ।
६४ प्रतिशत अर्थशास्त्रीले सम्झौताको नाटक मात्र हुने बताएका छन । करिब एक तिहाइले दुबै मुलुकबीच कुनै ठोस सहमति नहुने जनाएका छन ।
सर्वेक्षणमा कर्पोरेशन र ट्रेड युनियनमा आबद्ध अमेरिकाका करिब २२६ जना अर्थ्विज्ञका धारणा समेटिएको छ। यो सर्वेक्षण जुलाई १४ देखि अगस्ट १ को अवधिमा गरिएको थियो।
२०७६ भदौ ४ गते प्रकाशित
वि.सं.२०७६ भदौ ४ बुधवार १५:३१ मा प्रकाशित
