काठमाडौं । चालू आर्थिक वर्षको एक महिनामा उपत्यकाभित्रका ४१ वटा व्यापारिक फार्मलाई कारबाही गरिएको छ ।
वाणिज्य आपूर्ति तथा उपभोक्ता संरक्षण विभागले मापदण्डविपरीत व्यापारिक फार्म सञ्चालन गरेर उपभोक्तालाई ठग्दै आएका व्यापारिक फार्मलाई कारबारी गरेको हो ।
आर्थिक वर्षको साउन मसान्तसम्म विभागले ८४ व्यापारिक फार्मको अनुगमन गरी ४१ वटा फार्मलाई कारबाही गरेको विभागले जनाएको छ ।
विभागका महानिर्देशक योगेन्द्र गौचनले ४१ वटा मापदण्डविपरीत सञ्चालन गरी उपभोक्ता ठग्दै आएका व्यापारीलाई ३ लाख ३७ हजार जरिमाना गरेको बताउनुभयो ।
८४ वटामध्ये २४ वटा व्यापारिक फार्मलाई स्पष्टीकरण सोधिएको, तीन वटा व्यावसायिक फार्मलाई सिलबन्दी गरिएको र १ वटा फार्मलाई मुद्दा दायर गर्ने सम्बन्धमा निर्णयका लागि पठाइएको, पाँचवटा नमुना गुणस्तर परीक्षणका लागि नमुना पठाइएको बताउनुभयो ।
विभागले चालू आर्थिक वर्षका एक महिनामा उपत्यका बाहिर चार वटा व्यापारिक फार्मको अनुगमन गरेको छ भने विभागले दुईवटा व्यावसायिक फार्मलाई कारबाही गरेको छ ।
मापदण्डविपरीत सञ्चालन गर्ने दुईवटा व्यावसायिक फार्मलाई १ लाख जरिमाना गरिएको विभागले जनाएको छ ।
२०७६ भदौ ६ गते प्रकाशित
वि.सं.२०७६ भदौ ६ शुक्रवार ११:३८ मा प्रकाशित
