वीरगन्ज । प्रहरीले वीरगन्जबाट नक्कली भारु नोटसहित दुईजनालाई पक्राउ गरेको छ । पक्राउ पर्नेहरुमा पर्साको बहुदरमाइ नगरपालिका–२ बैरिया विर्ताका ३४ वर्षीय दिलिप साह र वीरगन्ज महानगरपालिका–२ छपकैयाका ४८ वर्षीय जमील अख्तर रहेका छन ।
उनीहरुको साथबाट दुई हजार दरका नक्कली भारु नोट ९५ थान अर्थात् १ लाख ९० हजार नक्कली भारु बरामद भएको जिल्ला प्रहरी कार्यालय पर्साले जानकारी दिएको छ ।
वीरगन्जबाट रक्सौल पैदल जाँदै गरेका दुवैजनालाई वीरगन्ज १६ इदगाह चोकमा प्रहरीले शंका लागेर चेकजाँच गर्दा उनीहरुको साथबाट दुई हजार दरको ९५ थान नक्कली भारु नोट बरामद गरेको पर्साका प्रहरी उपरीक्षक सोमेन्द्र सिंह राठौरले जानकारी दिनुभयो ।
नक्कली भारु नोटसहित पक्राउ परेका दुवैजनालाई जिल्ला प्रहरी कार्यालय पर्साको हिरासतमा राखेर थप अनुसन्धान भइरहेको रौठारले बताउनुभयो ।
२०७६ भदौ ६ गते प्रकाशित
वि.सं.२०७६ भदौ ६ शुक्रवार १५:२७ मा प्रकाशित