काठमाडौं । युट्युब च्यानलहरूले बिकृति फैलाएको आरोप लागिरहेका बेला सरकारले नियमन गर्ने घोषणा गरेको छ ।
युट्युब च्यानलहरूमा देखाइने सामाग्रीहरूलाई नियमन र अनुगमन गर्ने गरेर विधेयक ल्याउन लागेको सरकारका प्रवक्ता एवम सूचना तथा प्रविधिमन्त्री गोकुल बास्कोटाले बताउनुभएको छ ।
उहाँले कानून र करको दायराभित्र रहेर युट्युबहरू चल्नुपर्ने चेतावनी दिनुभयो ।‘युट्युबमा छाडा विषयवस्तु र सामाग्रीहरू राख्ने गरिएको छ । यसलाई नियमन गर्ने नै हो’, उहाँले भन्नुभयो, ‘अर्को आमसञ्चार विधेयक आउँछ । त्यसले युट्युबहरूलाई कानून र नियमभित्र राख्छ ।’
‘युट्युबहरू दर्ता भएर कम्पनीका रुपमा आउनुपर्छ । उनीहरूका लागि कानून आउँदै छ’, उहाँले भन्नुभयो, ‘समाजलाई बिथोल्ने गरेर आउन पाइँदैन । युट्युबहरूले कर तिर्नुपर्छ । कर प्रणालीभित्र आउनुपर्छ ।’
मन्त्री बास्कोटाले पत्रकारहरूलाई आफ्नो दायराभित्र बस्न चेतावनी दिएका भएको छ । उहाँले भट्टी पसलमा बसेर पत्रकारको कार्ड देखाउने र ब्ल्याकमेलिङ गर्ने छुट कसैलाई पनि नरहेको बताउनुभयो ।
२०७६ भदौ १३ गते प्रकाशित
वि.सं.२०७६ भदौ १३ शुक्रवार १३:०८ मा प्रकाशित
