काठमाडौं । सिभिल बैंकको १२ लाख ८२ हजार ८८१ कित्ता संस्थापक सेयर लिलामी भर्ने म्याद सोमबार ९भदौ १६ गते० सकिँदैछ । लगानीकर्ताले अब आइतबार र सोमबार गरी जम्मा २ दिन समय पाउनेछन् । बैंकले भदौ २ गतेदेखि ५ जना संस्थापक सेयरधनीको सेयर जोडेर एकैपटक लिलामी बिक्री खुला गरेको हो ।
बिक्री प्रबन्धक सिभिल क्यापिटलका अनुसार यस लिलामी सेयरमा बैंककै संस्थापक सेयरधनी, व्यक्ति, कम्पनी तथा संघ–संस्थाहरुले आवेदन दिन सक्नेछन् ।
संस्थापक समूहको यो सेयर सर्वसाधारणले पनि किन्न पाउनेछन् । यसमा न्यूनतम १०० रुपैयाँ वा सो भन्दा बढी मूल्य कबोल गरी गोप्य शिलबन्दी बोलपत्र पेश गर्नुपर्नेछ ।
लगानीकर्ताले न्यूनतम १० हजार कित्तादेखि अधिकतम सबै कित्ताका लागि आवेदन दिन सक्नेछन् । सिभिल क्यापिटल मार्केट सुन्धारा, काठमाडौंमा पुग्ने गरी आवेदन बुझाउनुपर्नेछ । लिलामी सेयरको आवेदन भदौ १७ गते बिहान ११ बजे सिभिल क्यापिटलको कार्यालय सुन्धारामा ११ बजे खोलिनेछ ।
असार मसान्तसम्म सिभिल बैंकको चुक्ता पुँजी ८ अर्ब ३३ लाख ९० हजार रुपैयाँ छ । आर्थिक वर्ष २०७५/७६ को चौथो त्रैमाससम्म आइपुग्दा बैंकले ७६ करोड ४ लाख ७ हजार रुपैयाँ खुद मुनाफा कमाएको छ । प्रतिसेयर आम्दानी ९ रुपैयाँ ५ पैसा रहेको सिभिलको प्रतिसेयर नेटवर्थ १२७ रुपैयाँ ९८ पैसा छ ।
२०७६ भदौ १५ गते प्रकाशित
वि.सं.२०७६ भदौ १५ आइतवार ११:५३ मा प्रकाशित
