काठमाडौं । सरकारले औपचारिक घोषणा विनै खसीबोका आयातमा कडाइ गरेपछि दशैंमा मासु महँगो हुने भएको छ । व्यवसायीहरूका अनुसार दशैंमा खसीको तयारी मासु प्रतिकेजी रू १५०० भन्दा माथि पुग्न सक्नेछ ।
हाल काठमाडौं उपत्यकामा दैनिक १ हजार २०० खसी बोकाको माग छ, जसको ४० प्रतिशत अंश भारतीय आयातबाट धानिएको छ । केही समय यता सरकारले भारतबाट आयात हुने खसीबोकाको आयातमा कडाइ गरिरहेको छ ।
चौपाया खरीद विक्री संघका अनुसार दशैं तिहारको समयमा उपत्यकामा मात्रै करीब ५० हजार खसीबोकाको माग हुन्छ । उक्त मागलाई धान्न सक्ने गरी स्वदेशमा खसीबोकाको उत्पादन हुन थालेको छैन ।
सरकारी कडाइले गर्दा दशैंमा भारतबाट लुकिछिपी खसीबोका ल्याइने र मासुको मूल्य बढ्ने सम्भावना रहेको संघका संरक्षक दीपक थापाले बताउनुभयो ।
उहाँका अनुसार हाल व्यवसायीहरूले भारतबाट लुकिछिपी खसीबोका ल्याएर नेपालका भन्दै बेचिरहेका छन । यसले गर्दा दशैंमा जिउँदो खसीको मूल्य प्रतिकिलो रू.८०० र तयारी मासु प्रतिकेजी रू. १५०० भन्दा माथिसम्म पुग्न सक्ने थापाले बताए ।
हाल उपत्यकामा जिउँदो खसीको मासु प्रतिकेजी रू. ६०० र तयारी मासु प्रतिकेजी रू. १३०० छ । आर्थिक अभियानबाट
२०७६ भदौ १६ गते प्रकाशित
वि.सं.२०७६ भदौ १६ सोमवार ०७:५१ मा प्रकाशित