काठमाडौं । चाइनिज ह्याकरले विभिन्न ६ बैंकको भिसा कार्ड प्रयोग गरेर साढे ३ करोड रुपैयाँ निकालेपछि गत शनिबार साँझदेखि एनआइसी एशिया र प्रभु बैंकको एटीएम बन्द भएको थियो । अरु बैंकले अन्तर बैंक एटीएम सेवामात्रै बन्द गरे पनि यी दुई बैंकले भने सम्पूर्ण एटीएम सेवा बन्द गरेका थिए ।
नेपाल इलेक्ट्रोनिक पेमेन्ट सिस्टम ९नेप्स० को सिस्टममा जोखिम रहेको भन्दै यी दुई बैंकले एटीएम सेवा सञ्चालनमा ल्याउन सकेका थिएनन् । नेप्से आफूहरुको सिस्टममा समस्या नभएको भन्ने जानकारी राष्ट्र बैंकलाई दिएपछि राष्ट्र बैंकले एनआइसी एशिया र प्रभु बैंकलाई एटीएम सेवा सञ्चालन गर्न निर्देशन दिएको हो ।
‘नेप्सेले हामीलाई सिस्टममा समस्या नरहेको र एटीएम सेवा सञ्चालन गर्न जोखिम नरहेको बताएको छ,’ राष्ट्र बैंकको भुक्तानी विभागका कार्यकारी निर्देशक बमबहादुर मिश्रले भने, ‘मैले एनआइसी एशिया र प्रभुलाई एटीएम सेवा सञ्चालन गर्न निर्देशन दिइसकेको छ ।’
कार्यकारी निर्देशक मिश्रले सोमबार साँझ साढे ५ बजे यस्तो निर्देशन दिएका हुन् । एटीएम सेवा बन्द हुँदा सेवाग्राही मर्कामा परेको भन्दै राष्ट्र बैंकले सेवा सञ्चालन गर्न निर्देशन दिएको हो ।
२०७६ भदौ १६ गते प्रकाशित
वि.सं.२०७६ भदौ १६ सोमवार १८:२३ मा प्रकाशित