काठमाडौं । नेपाल राष्ट्र बैंकले आफ्नो विभिन्न कोषमा रहेको डेढ अर्ब रुपैयाँ वाणिज्य बैंक, विकास बैंक र फाइनान्स कम्पनीहरुमा मुद्धती निक्षेपमा लगानी गने भएको छ ।
त्रैमासिक रुपमा व्याज भुक्तानी हुनेगरी राष्ट्र बैंकले असोज १ गतेदेखि एक वर्ष अर्थात ३६५ दिनको मुद्दति निक्षेपमा लगानी गन लागेको हो।
राष्ट्र बैंकले ’क’ वर्गका वाणिज्य बैंकहरुमा १ अर्ब २६ करोड ८६ लाख रुपैयाँ, ’ख’ वर्गका विकास बैंकहरुमा २३ करोड ७८ लाख रुपैयाँ र ’ग’ वर्गका वित्त कम्पनीहरुमा ७ करोड ९२ लाख रुपैयाँ गरी कूल १ अर्ब ५८ करोड ५६ लाख रुपैयाँ लगानी गर्न लागेको हो ।
राष्ट्र बैंकको निक्षेप लिन चाहाने बैंक तथा वित्तिय संस्थाहरुले आफुले लिन चाहेको रकम तथा उक्त रकममा दिने ब्याजदर समेत खुलाई भदौ १९ गतेसम्म शिलबन्दी बोलपत्र आवेदन पेश गर्न सक्नेछन ।
राष्ट्र बैंकको निक्षेप लिनको लागि बैंक तथा वित्तीय संस्था सञ्चालनमा आएको कम्तीमा दुई वर्ष पूरा गरेको, न्यूनतम पूँजीकोष कायम रहेको, निष्कृय कर्जा कूल कर्जाको पाँच प्रतिशत भन्दा कम भएको जस्ता शर्तहरु पूरा गरेको हुनुपर्नेछ ।
त्यसैगरी खुद तरल सम्पत्ति स्वदेशी निक्षेपको कम्तीमा बीस प्रतिशत वा सो भन्दा बढी रहेको, समस्याग्रस्त घोषणा नभएको, समस्याग्रस्त घोषणा भएको अवस्थामा फुकुवा भएको छ महिना अवधि पुरा भएको र सर्वसाधारणको लागि छुट्याईएको शेयर जारी गरीसकेको हुनुपर्ने राष्ट्र बैंकले जनाएको छ ।
२०७६ भदौ १७ गते प्रकाशित
वि.सं.२०७६ भदौ १७ मंगलवार १२:५१ मा प्रकाशित
