काठमाडौं । चालु आर्थिक वर्षको पहिलो महिना साउनमा २३ अर्ब ४६ करोड रुपैयाँ बराबरको धितोपत्रहरु सूचीकृत भएका छन ।
केन्द्रीय बैंकका अनुसार साउनमा २० अर्ब ६४ करोडको साधारण सेयर, २ अर्ब ६७ करोड बराबरको बोनस सेयर सूचीकरण गरिएको हो ।
सैगरी, १५ करोड रुपैयाँको डिबेन्चर पनि सूचीकृत भएका छन । यस अवधिमा धितोपत्र बोर्डले १ अर्ब रुपैयाँ बराबरको डिबेन्चर जारी गर्न अनुमति प्रदान गरेको छ ।
नेपाल स्टक एक्सचेन्जमा गत साउन मसान्तसम्ममा ४ अर्ब ३४ करोड कित्ता सेयर सूचीकृत भएका छन् । यसको चुक्ता मूल्य ४ खर्ब २५ अर्ब ५२ करोड रुपैयाँ रहेको छ ।
नेप्सेमा बैंक, वित्तीय संस्था र बिमा कम्पनीहरुको बजार पुँजीकरणमा ७७.९५ हिस्सा रहेको छ । यसैगरी, जलविद्युतको ६.९५, उत्पादनमूलकको ४.१५, होटेलको १.७५ हिस्सा छ ।व्यापारिक समूहको ०.१५ र अन्य समूहका कम्पनीहरुले ९.३५ हिस्सा ओगटेका छन ।
एक वर्षमा नेप्से सूचक १.१५ ले बढेको छ । नेपाल राष्ट्र बैंकको तथ्यांक अनुसार चालु आर्थिक वर्षको साउन महिनामा नेप्से सूचकांक १.१५ ले बढेर १२२४ को बिन्दुमा पुगेको थियो ।
तर गत आर्थिक वर्षको साउन महिनामा नेप्से परिसूचक १२१०.३ को बिन्दुमा रहेको थियो । यद्दपि, अहिले असोज पहिलो सातामा नेप्से सूचक घटेर फेरि ११३४ विन्दु आसपासमा रहेको छ ।
धितोपत्र बजार पुँजीकरण वार्षिक बिन्दुगत आधारमा ७.७५ ले वृद्घि भई २०७६ साउन मसान्तमा १५५१ अर्ब ६० करोड रुपैयाँ कायम भएको छ । २०७६ असार मसान्तमा बजार पुँजीकरण १५६७ अर्ब ५० करोड रहेको थियो ।
अहिले असोज पहिलो सातालाई हेर्ने हो भने १४ अर्ब ४१ अर्ब हाराहारीमा झरिसकेको छ । सेयर बजार निरन्तर घटेकाले बजार पुँजीकरण पनि तल गएको हो ।
बजार पुँजीकरणले सामान्य हिसाबमा लगानीकर्ताको सम्पति भन्ने जनाउँछ । नेपाल स्टक एक्सचेन्ज लिमिटेडमा सूचीकृत कम्पनीहरूको संख्या २०७६ साउन मसान्तमा २१७ रहेको छ ।
२०७६ असोज ०७ गते प्रकाशित
वि.सं.२०७६ असोज ७ मंगलवार १८:२१ मा प्रकाशित
