काठमाडौं । निर्वाचन आयोगले नयाँ दर्ता भएका दलहरूलाई मंसिर १४ गतेको उपनिर्वाचनका लागि चुनाव चिन्ह प्रदान गरेको छ ।
उपचिनर्वाचनका लागि ४८ दल दर्ता भएका छन । आयोगमा दर्ता कायम रहेका नेपाली कांग्रेस लगायतका दलहरूले पुरानै चुनाव चिह्न पाएका छन । तर एकीकरण भएका र नयाँ दर्ता भएका दलहरूले भने नयाँ चुनाव चिन्ह पाएका छन ।
एमाले र माओवादी एकतापछि बनेको सत्तारूढ नेकपाले उपनिर्वाचनमा सूर्य चुनाव चिन्ह प्रयोग गर्ने भएको छ । अघिल्लो निर्वाचनमा उक्त चिन्ह तत्कालीन नेकपा एमालेको थियो। नेकपा माओवादी केन्द्रले गोलाकारभित्रको हँसिया हथौडा चिन्ह प्रयोग गरेको थियो ।
तर गोलाकारभित्रको हँसिया हथौडा चिन्ह यसपटक पनि मतपत्रमा छापिने छ। एमाले र माओवादीको एकतासँग असन्तुष्ट रहेका गोपाल किराँतीको पार्टीले सोही चुनाव चिन्ह प्रयोग गर्ने भएको हो।
त्यस्तै, सत्तारूढ समाजवादी पार्टीले पाँच औंलासहितको हत्केला चुनाव चिन्ह प्रयोग गर्ने भएको छ । उपेन्द्र यादवको संघीय समाजवादी फोरम नेपाल र बाबुराम भट्टराईको नयाँ शक्ति पार्टी एकीकरण भएर समाजवादी पार्टी बनेको हो ।
फोरमले मसाल र नयाँ शक्तिले आँखा चुनाव चिन्ह लिएर यसअघि निर्वाचन लडेका थिए । त्यस्तै, साझा पार्टीले तराजु चुनाव चिन्ह पाएको छ।
विजय गच्छदार नेतृत्वको नेपाल लोकतान्त्रिक पार्टीले गत चुनाव अघि नेपाली कांग्रेससँग एकीकरण गरेको थियो । तर एकीकरणमा असन्तुष्टहरूले नेपाल फोरम लोकतान्त्रिक पार्टीको नाममा दुई हात जोडेको नमस्कार चुनाव चिन्ह पाएका छन । सिके राउतको जनमत पार्टीले लाउड स्पिकर चुनाव चिन्ह पाएको छ ।
२०७६ असोज ०९ गते प्रकाशित
वि.सं.२०७६ असोज ९ बिहीवार १७:३२ मा प्रकाशित
