काठमाडौं । शिक्षक सेवा आयोगले लिएको माध्यमिकतर्फको अध्ययन अनुमतिपत्रको परीक्षामा त्रुटि भेटिएको छ । शुक्रबार बिहान ८ बजेदेखि लिएको परीक्षामा प्रश्नपत्रमै उत्तर भेटिएको छ ।
नेपाल सरकार, शिक्षक सेवा आयोगले लिने माध्यमिक तहको अध्यापन अनुमतिपत्रको प्रश्नपत्रमा उत्तर भेटिएपछि केहीबेर परीक्षा स्थगन गरिएको थियो ।
मुलुकभर करिब १३ हजार ५ सय विद्यार्थीले अङ्ग्रेजी विषयमा परीक्षा दिने आयोगको अध्यक्ष ताना गौतमले जानकारी दिनुभएको छ ।
केन्द्र ‘क’मा अंग्रेजी विषयको समूह ‘घ’को वस्तुगत प्रश्नपत्रका प्रश्नको वैकल्पिक सही उत्तर स्पष्ट देखिने गरी गाढा अक्षरमा आएपछि परीक्षा स्थगन गरिएको ताना गौतमले बताउनुभयो ।
प्रश्नपत्रमा समावेश हुने सबै ४० वटै प्रश्नको उत्तर प्रश्नपत्रमा नै छापिएको छ । अध्यक्ष ताना गौतमले आयोगले जाँच गर्दा आवश्यक पर्ने उत्तरकुञ्जिका आएपछि तीनवटा समूहको मात्रै परीक्षा लिइएको बताउनुभयो ।
मुलुकभरका ७७ जिल्लाका ५५ केन्द्रमा यस्तो समस्या आएको उहाँले भनाई छ । तर त्यही केन्द्रमा अन्य प्रश्नपत्र ठीक भएकाले तोकिएकै समयमा नै परीक्षा सञ्चालन भएको छ ।
शिक्षक सेवा आयोगले असोज ९ गतेदेखि ११ गतेसम्म प्राथमिक तह, माध्यमिक तह र निम्न माध्यमिक तहको परीक्षा लिइरहेको छ ।
२०७६ असोज १० गते प्रकाशित
वि.सं.२०७६ असोज १० शुक्रवार १८:५४ मा प्रकाशित