काठमाडौं । एनएमबि लघुवित्त वित्तीय संस्थाले चालु आर्थिक वर्षको पहिलो त्रैमासमा १ करोड ५२ लाख ८६ हजार रुपैयाँ खुद नाफा कमाएको छ ।
यो नाफा गत वर्षको भन्दा १४०३ प्रतिशतले धेरै हो । गत वर्ष कम्पनीले १० लाख १७ हजार रुपैयाँ मात्र खुद नाफा कमाएको थियो ।
कम्पनीको खुद ब्याज आम्दानी ३६.०५ प्रतिशतले बढेर ५ करोड ९९ लाख ४६ हजार रुपैयाँ पुगेको छ । गत वर्ष ४ करोड ४० लाख ६१ हजार रुपैयाँ खुद ब्याज आम्दानी गरेको थियो ।
यस्तै, एनएमबिको सञ्चालन नाफा पनि १४७२.७० प्रतिशतले बढेर २ करोड ३७ लाख ९५ हजार रुपैयाँ पुगेको छ । गत वर्ष १५ लाख १३ हजार रुपैयाँ मात्र सञ्चालन नाफा आर्जन गरेको थियो ।
कम्पनीको सञ्चालन नाफा ह्वात्तै पढेपछि खुद नाफा पनि चुलिएको हो । एनएमबिले यस त्रैमास सम्ममा १ अर्ब १८ करोड ५ लाख ४० हजार रुपैयाँ निक्षेप संकलन गरी ३ अर्ब १८ करोड १९ लाख रुपैयाँ कर्जा प्रवाह गरेको छ ।
खराब कर्जा पनि २.७२ प्रतिशतबाट घटेर २.२७ प्रतिशतमा आएको छ । चुक्ता पुँजी १६ करोड २० लाख ६ हजार रुपैयाँ रहेको यस लघुवित्तको जगेडा कोषमा १६ करोड २६ लाख ४१ हजार रुपैयाँ छ ।
चुक्ता पुँजीको आधारमा यो जगेडा कोषलाई आकर्षक मान्न सकिन्छ । प्रतिसेयर आम्दानी ३७ रुपैयाँ ७४ पैसा रहेको एनएमबिको प्रतिसेयर नेटवर्थ २०० रुपैयाँ ३९ पैसा छ ।
यता, एनएमबि १५० प्रतिशत हकप्रद ल्याउने तयारीमा छ । बोर्डले एनएमबिलाई १ः१.५ अनुपातमा २४ लाख ३० हजार ९३ कित्ता हकप्रद सेयर बिक्री गर्न अनुमति दिएको हो ।
यसमा बिक्री प्रबन्धकको काम सनराइज क्यापिटलले गर्नेछ । इक्रा नेपालले यस हकप्रदलाई औसत भन्दा कम आधार जनाउने ग्रेड ४ रेटिङ प्रदान गरेको छ । हकप्रद निष्कासनपछि भने यसको पुँजी ४० करोड ५० लाख भन्दा धेरै हुनेछ ।
२०७६ कात्तिक ०४ गते प्रकाशित
वि.सं.२०७६ कात्तिक ४ सोमवार १०:३५ मा प्रकाशित