काठमाडौं । नेपालको एक मात्रै पुनर्बीमा कम्पनीले प्रमुख कार्यकारी अधिकृत पदको लागि विज्ञापन खुला गरेको छ । कम्पनीले खुला प्रतिस्पर्धाबाट प्रमुख कार्यकारी अधिकृत नियुक्त गर्ने भएको हो ।
आवदेन दिन कम्तिमा पनि तोकिएका विषयमा स्नातकोत्तर गरि ८ वर्षको कार्यानुभव हुनु पर्नेछ । तोकिएका विषयमा स्नातक गरेकाहरुको हकमा तोकिएका कार्यक्षेत्रमा १३ वर्षको कार्यानुभव हुनु पर्नेछ ।
उमेर ६५ वर्ष पुरा नभएको हुनु पर्ने कम्पनीले जनाएको छ । योग्यता पुगेका निवेदकले आफ्नो व्यवसायिक योजनासहित आवेदन दिनु पर्ने छ । निवेदनका साथ नेपाल पुनर्बीमा कम्पनी सम्बन्धी ५ हजार शब्द नबढ्ने गरि व्यवसायिक योजना प्रस्तुत गर्नु पर्ने छ ।
व्यवसायिक योजना बनाउँदा बीमा तथा पुनर्बीमा क्षेत्रको अन्तर्रा्ष्ट्रिय तथा राष्ट्रिय परिदृश्य, व्यवसायिक कार्ययोजना, प्रक्षेपित वित्तीय विवरणहरु खुलाउनु पर्नेछ ।
आवदेन दिनेमध्ये उत्कृष्ट ५ जनालाई छनौंट गरि अन्तर्वार्ताको लागि बोलाउने कम्पनीले जनाएको छ। अबको २१ दिन भित्रमा निवेदन दिन सकिनेछ ।
गत असार मसान्तदेखि प्रमुख कार्यकारी अधिकृत पद खाली छ। चिरायु भण्डारीको कार्यकाल सकिएपछि हाल निमित्त प्रमुख कार्यकारी अधिकृत पदमा रहेर दामोदर भण्डारीले प्रमुखको जिम्मेवारी बहन गर्दै आएका छन ।
कम्पनीले सार्वजनिक गरेको अघिल्लो आर्थिक वर्षको लेखापरिक्षण प्रतिवेदन अनुसार प्रमुख कार्यकारी अधिकृतले वार्षिक ३१ लाख ९३ हजार तलव लिएका थिए ।
२०७६ कात्तिक ०७ गते प्रकाशित
वि.सं.२०७६ कात्तिक ७ बिहीवार १०:०६ मा प्रकाशित
