काठमाडौं । मर्जरको प्रक्रियामा रहेका ग्लोबल र जनता बैंकले साधारणसभा डाकेका छन । दुबैले साधारणसभामा संयुक्त मर्जर समितिले तय गरेको स्वाप रेसियोको प्रस्ताव पेस गर्ने भएका छन ।
मर्जर समितिले ग्लोबल आइएमईको १०० कित्ता बराबर जनताको ८५ कित्ता हुने गरी स्वाप रेसियो तय गरेका हुन । दुबै बैंकले मंसिर २ गते छुट्टाछुट्टै साधारणसभा डाकेका छन ।
ग्लोबल आइएमईले गत आर्थिक वर्षको नाफाबाट १२.७५ प्रतिशत नगद लाभांस र १२.७५ प्रतिशत नै बोनस शेयर दिने प्रस्ताव साधारणसभा पेस गर्ने भएको छ ।
त्यस्तै जनताले ६ प्रतिशत नगद लाभांस र ६ प्रतिशत नै बोनस शेयर दिने प्रस्ताव साधारणसभामा पेस गर्ने छ । जनता र ग्लोबल आइएमई एक आपसमा गाभ्ने गाभिने संझौता भए सँगै असार २२ गतेदेखि दोस्रो बजारमा कारोबार बन्द छ ।
कात्तिक २० देखि २८ गतेसम्म बैंकको शेयर रजिष्ट्रार ग्लोबल आइएमई क्यापिटलमा दर्ता हुनेले लाभांस र मतदानको अधिकार प्राप्त गर्न सक्ने ग्लोबलले जनाएको छ ।
ग्लोबलले १५ अर्ब रुपैयाँको अधिकृत पूँजी बृद्धि गरि २५ अर्ब रुपैयाँ कायम गर्ने विशेष प्रस्ताव साधारणसभामा पेश गर्नेछ । ग्लोबलको बोनस शेयरपछि चुक्ता पूँजी ११ अर्ब ६२ करोड रुपैयाँ र जनताको ८ अर्ब ४८ करोड रुपैयाँ पुग्नेछ। मर्जरपछि भने २० अर्ब १० करोड रुपैयाँ पुग्नेछ ।
२०७६ कात्तिक १४ गते प्रकाशित
वि.सं.२०७६ कात्तिक १४ बिहीवार १०:१० मा प्रकाशित
