काठमाडौं । एटिएमको प्रणाली नै ह्याक गरेर पैसा लुट्ने चिनियाँ आपराधिक समूहका विदेशी नागरिकालाई थुनामा राख्न उच्च अदालतले आदेश दिएको छ ।
उच्च अदालत पाटनको वाणिज्य इजलासले पक्राउ परेका चिनियाँ र फ्रेन्च नागरिकलाई थुनामा राख्न आदेश दिएको हो ।
चिनियाँ नागरिक लिन जियानमेङ, लुओ जियालेइ, झु लियानग्याङ, क्वी युनकिङ, चेन बिन बिन र फ्रेन्च नागरिक सु लुसिङलाई थुनामा पठाएको हो ।
त्यस्तै पक्राउ परेका तीन नेपालीलाई भने धरौटी बुझाएर रिहा गर्न आदेश दिएको छ । गएको भदौ १६ गते प्रहरीले ठमेलमा रहेको डिस्को र नेपालय मनिचेन्जरका देवनाथ लामिछाने सहित रोशन प्रधान श्रेष्ठ र रेवती दवाडीलाई नियन्त्रणमा लिएको थियो ।
अदालतले लामिछानेसँग ३० लाख रुपैयाँ र प्रधान र दुवाडीसँग जनही २६ लाख रुपैयाँ मागेको छ । धरौटीमा रिहा भए पनि उनीहरुलाई विदेशी मुद्राको अपचलन गरेको अभियोगमा महानगरीय प्रहरी परिसर काठमाडौंमा थप अनुसन्धान हुने भएकाले धरौटी बुझाए पनि रिहा हुने छैनन ।
प्रहरीले गत भदैमा पक्राउ परेका विदेशी नागरिकको साथबाट साथबाट १ करोड २६ लाख २९ हजार ४५ नेपाली रुपैयाँ र ९ हजार १ सय ८ अमेरिकी डलर बरामद गरेको थियो ।
२०७६ कात्तिक २१ गते प्रकाशित
वि.सं.२०७६ कात्तिक २१ बिहीवार १६:३९ मा प्रकाशित
