काठमाडौं । मुक्तिनाथ विकास बैंक लिमिटेडको तेह्रौं वार्षिक साधारण सभा मंसिर ३० गते हुने भएको छ । बैंकले होटल पोखरा ग्राण्ड, पार्दी, विरौटा, पोखरामा बिहान ११ बजे सभा बोलाएको हो ।
२०७५/०७६ वार्षिक प्रतिवेदनउपर छलफल गरी पारित गर्ने, सोही आवको नाफा नोक्सान हिसाब र नगद प्रवाह विवरण पारित गर्ने, लेखा परीक्षकको नियुक्ति र निजको पारिश्रमिक निर्धारण गर्ने, संस्थापक शेयरधनीको तर्फबाट प्रतिनिधित्व गर्ने ३ जना र सर्वसाधारण शेयरधनीको तर्फबाट प्रतिनिधित्व गर्ने २ जना सञ्चालकको निर्वाचन गर्ने लगायतको विषयमा छलफल गर्न कम्पनीले सभा बोलाएको हो ।
बैंकले शेयरधनीको लागि १२औं साधारण सभाबाट पारित २० प्रतिशत हकप्रद शेयर वितरणबाट हुन आउने रकम समेत गरी बैंकको जारी तथा चुक्तापूँजीबाट १७ दशमलव ६० प्रतिशत बोनस शेयर र कर प्रयोजनका लागि शून्य दशमलव ९३ प्रतिशत नगद लाभांशको प्रस्ताव पारित गर्ने भएको छ ।
कम्पनीको विशेष प्रस्तावमा बैंकको अधिकृत पूँजी ५० अर्ब र्पुयाउने, जारी तथा चुक्तापूँजी वृद्धि गर्ने, अन्य कुनै एक वा सो भन्दा बढी उपयुक्त लघुवित्त संस्थासँग गाभ्ने गाभिने वा प्राप्ति गर्ने अधिकार सञ्चालक समितिलाई प्रदान गर्ने, बैंकको प्रबन्धपत्र तथा नियमावलीमा संशोधन गर्ने रहेको छ ।
साधारण सभा प्रयोजनको लागि कम्पनीले मंसिर २३ गतेदेखि ३० गतेसम्म शेयरधनी दर्ता पुस्तिका बन्द गर्ने भएको छ । मंसिर २२ गतेसम्मका कायम शेयरधनीले मात्र सभामा भाग लिन पाउनेछन् ।
२०७६ मंसिर ०३ गते प्रकाशित
वि.सं.२०७६ मंसिर ३ मंगलवार ०९:२५ मा प्रकाशित
