काठमाडौं । कार्यसम्पादन सन्तोषजनक नभएका कर्मचारीलाई जिम्मेवारीबाट हटाउन भन्दै संस्कृति पर्यटन तथा नागरिक उड्डयन मन्त्री योगेश भट्टराईले निर्देशन दिएपछि नेपाल नागरिक उड्डयन प्राधिकरणले व्यापक रुपमा कर्मचारीको सरुवा गरेको छ ।
प्राधिकरणका महानिर्देशक राजन पोखरेलले एकैदिन ३८ जनाको सरुवा गरेका हुन । कार्यसम्पादन सन्तोषजनक नभएका र कतिपयको आवस्यकताअनुसार सरुवा गरिएको प्राधिकरण सम्बद्ध स्रोतले जानकारी दिएको छ । योसहित पोखरेल महानिर्देशक भएर आएदेखि ६५ जनाको सरुवा गरेका छन् ।
आइतबार भएको सरुवाअनुसार निजगढ अन्तराष्ट्रिय विमानस्थल आयोजना प्रमुख ओम शर्मालाई त्रिभुवन अन्तराष्ट्रिय विमानस्थलमा सरुवा गरिएको छ ।
त्यस्तै विमानस्थल अपरेशन विभाग प्रमुख प्रताप तिवारीलाई गौतम बुद्ध अन्तराष्ट्रिय विमानस्थल प्रमुख बनाइएको छ। उनले विमानस्थल सञ्चालनका लागि काम गर्ने छन । उनको ठाउँमा देवेन्द्रलाल कर्णलाई सरुवा गरिएको प्राधिकरण स्रोतले जानकारी दियो ।
त्यस्तै त्रिभुवन अन्तराष्ट्रिय विमानस्थल क्षमता अभिबृद्धि बयोजना प्रमुखबाट बाबुराम पौडेललाई हटाइएको छ। उनको ठाउँमा मुरारी शर्मा गएका छन ।
प्राधिकरणका अधिकांस महाशाखा प्रमुखको सरुवा उनले यसअघि नै गिसकेका थिए । उनले यसअघि विवादित छबीका उपमहानिर्देशक देवानन्द उपाध्यायालाई तालिम केन्द्रमा पठाएका थिए । त्यस्तै राजकुमार क्षेत्रीलाई प्राधिकरण तानेर देवेन्द्र केसीलाई विमानस्थल पठाएका थिए ।
२०७६ मंसिर १० गते प्रकाशित
वि.सं.२०७६ मंसिर १० मंगलवार १०:४१ मा प्रकाशित
