काठमाडौं । नेशनल माइक्रोफाइनान्स वित्तीय संस्था लिमिटेडको छैठौँ वार्षिक साधारणसभाले ७५ प्रतिशत बोनस सेयर र ५ प्रतिशत नगद लाभांश गरी कूल ८० प्रतिशत लाभांश प्रस्ताव पारित गरेको छ ।
आइतबार धादिङमा सम्पन्न वार्षिक साधारणसभाले उक्त प्रस्ताव पारित गरेको हो । सञ्चालक समितिका अध्यक्ष केशवप्रसाद आचार्यको अध्यक्षतामा सम्पन्न साधारणसभाले बोनस सेयर जारीपश्चात् कायम हुन आउने जारी चुक्ता पुँजीको ५० प्रतिशत अर्थात् २ः१ को अनुपातमा हकप्रद सेयर जारी गर्ने प्रस्तावसमेत पारित गरेको छ ।
संस्थाले २०७६ मङ्सिरसम्ममा देशको सातवटै प्रदेश हिमाल, पहाड र तराईमा गरी ४३ वटा जिल्लामा ६५ वटा शाखा कार्यालयमार्फत् ८२ हजारभन्दा बढी विपन्न परिवारलाई सेवा र्पुयाएको छ। यस अवधिमा संस्थाले ५५ हजारभन्दा बढी सदस्यहरूलाई विभिन्न परियोजना सञ्चालन गर्नका लागि ४ अर्ब रुपैयाँ कर्जा लगानी गरेको छ।
कार्यक्रममा संस्थाका प्रमुख कार्यकारी अधिकृत रामबहादुर यादवले ग्राहक सदस्यहरूबाट कूल बचत १ अर्ब ४४ करोड सङ्कलन गर्न सफल भएको जानकारी गराए ।
संस्थाले आगामी दिनमा विशेषगरी क्रेडिट प्लस गतिविधिमा केन्द्रित गरी सदस्यहरूको व्यावसायिक विकासलगायत प्रविधिको उच्चतम प्रयोग गरी अगाडि बढ्ने योजना रहेको उनले बताए ।
कार्यक्रममा संस्थापक सेयरधनी योगेन्द्र संग्रौला, संस्थापक सञ्चालक डा.रमा बश्याल गौतम, संस्थापक सेयरधनी माधवप्रसाद घिमिरे र संस्थागत संस्थापक सेयरधनी मुकुन्द श्रेष्ठले अध्यक्षको प्रतिवेदनमाथि मन्तव्य, सुझाव तथा उत्तरोतर प्रगतिको कामनासहितको मन्तव्य राखेका थिए ।
२०७६ मंसिर ३० गते प्रकाशित
वि.सं.२०७६ मंसिर ३० सोमवार १२:४५ मा प्रकाशित