काठमाडौं । एभरेष्ट बैंकले एक अर्ब रूपैयाँको ऋणपत्र निष्कासन गर्ने भएको छ । बैंकले ७ वर्ष अवधिको ‘एभरेष्ट बैंक डिबेन्चर २०८३’ जारी गर्ने भएको हो । ऋणपत्रको ब्याजदर १०.२५ प्रतिशत छ ।
बैंकले सर्वसाधारणका लागि ४० करोड रूपैयाँको ऋणपत्र निष्कासन गर्नेछ भने बैंक आफैंले ६० करोड रूपैयाँको बिक्री गर्ने छ । धितोपत्र निष्कासन तथा बिक्री प्रबन्धकमा एनआइबीएल एस क्यापिटल रहेको छ। एभरेष्ट बैंकको यो तेस्रो ऋणपत्र हो ।
८ प्रतिशत ब्याजदरका दुईवटा ऋणपत्र ‘एभरेष्ट बण्ड २०७८’ र ‘एभरेष्ट बण्ड २०७९’ छन् । २०७९ मा सकिने ऋणपत्रको आकार ४६ करोड ७८ लाख रूपैयाँ र २०७८ मा सकिते ऋणपत्रको आकार ६० करोड रूपैयाँको छ ।
अहिले निष्कासन गर्न लागिएको ऋणपत्र नेपाल राष्ट्र बैंकको मौद्रिक नीतिमा भएको व्यवस्थाको कार्यान्वयन हो । मौद्रिक नीतिमार्फत सबै वाणिज्य बैंकहरूले चुक्ता पुँजीको कम्तिमा पनि २५ प्रतिशत ऋणपत्र निष्कासन गर्नैपर्ने व्यवस्था गरेको छ ।
२०७६ पुस २५ गते प्रकाशित
वि.सं.२०७६ पुस २५ शुक्रवार १०:१४ मा प्रकाशित