काठमाडौं । भुकम्पले भत्काएका थप ८६ हजार आवास पुनःनिर्माणका लागि विश्व बैंकले ऋण दिने भएको छ । नेपाललाई दिने २ सय मिलियन डलर (करिब २२ अर्ब ६५ करोड रुपैयाँ) ऋण सहयोग स्वीकृत भएको विश्व बैंकले जानकारी दिएको छ ।
नेपालमा विश्व बैंकले संचालन गरिरहेको अर्थक्वीक हाउजिङ रिकन्स्ट्रक्सन्स प्रोजेक्ट (ईएचआरपी–भुकम्पले भत्काएका घरको पुनःनिर्माणका लागि बनाइएको परियोजना)लाइ उक्त ऋण सहयोग स्वीकृत गरिएको छ ।
परियोजनाको दोस्रो चरणको कामका लागि नेपालले उक्त ऋण सहयोग प्राप्त गर्न लागेको हो । भुकम्पबाट प्रभावित निजी आवासतर्फ थप ८६ हजार ६८० घरको पुनर्निर्माणका लागि यो ऋण सहयोग गर्नेगरी विश्व बैंकल सो रकम उपलब्ध गराएको हो ।
बैंकले दिएको उक्त रकम भूकम्पबाट अति प्रभावित ३२ जिल्लाका भूकम्प पीडितको घर पुनःनिर्माण खर्च हुने बताइएको छ । नेपाल सरकारको पुनर्निर्माणको काममा विश्व बैंकले सहयोग गरिरहेको नेपाल, श्रीलंका र माल्दिभ्सका लागि विश्व बैंकका कन्ट्री म्यानेजर स्वाराही रिडिहोले बताएका छन् ।
सन् २०१५ मा विश्व बैंकले ५५ हजार घरको पुनःनिर्माण लागि ऋण सहयोग गरेको थियो । यससँगै सन् २०१७ मा सहायता रकम बढाएर थप ९६ हजार घर पुनःनिर्माणमा सहयोग गरेको थियो ।
२०७६ माघ ०१ गते प्रकाशित
वि.सं.२०७६ माघ १ बुधवार १५:३४ मा प्रकाशित
