काठमाडौं । दुई लघुवित्तलाई मर्जर गरेको एक वर्ष पनि नवित्दै सुदूरपश्चिम प्रदेशको धनगढीमा रहेको एनआरएन लघुवित्त वित्तीय संस्थाले अर्को मर्जर सम्झौता गरेको छ ।
सुदुरपश्चिमको कैलालीमा केन्द्रीय कार्यालय रहेको एनआरएन लघुवित्तले कैलालीमै केन्द्रीय कार्यलय रहेको किसान लघुवित्त र काभ्रेको नमोबुद्ध नगरपालिकामा केन्द्रीय कार्यलय रहेको दिब्य लघुवित्तसँग मर्जर गर्ने सम्झौता गरेको हो ।
उक्त सम्झौतामा किसान माइक्रोफाइनान्स तर्फबाट सञ्चालक समितिका अध्यक्ष नेत्रप्रसाद जोशी, एनआरएन लघुवित्तका तर्फबाट मर्जर समिति संयोजक शम्भु घिमिरे र दिव्य लघुवित्तका तर्फबाट मर्जर समिति संयोजक महेश बस्नेतले हस्ताक्षर गरेका छन् ।
आगामी चैत मसान्त भित्र एकीकृत कारोबार गर्ने गरि मर्जरको कार्य तीव्र गतिमा गरिने उल्लेख छ । कम्पनीको अध्यक्ष तथा प्रमुख कार्यकारी अधिकृत(सीईओ) हालको एनआरएन लघुवित्त वित्तीय संस्थाबाटै रहने सहमति भएको छ भने संस्थाको नाम एकीकृत साधारण सभाले परिवर्तन नगरेसम्म एनआरएन लघुवित्त वित्तिय संस्था लि नै रहने छ ।
मर्जपछि बन्ने संस्थाको नाम एनआरएन लघुवित्त हुने र संस्थाको अध्यक्ष र सीईओ पनि एनआरएनबाट नै हुने बताइएको छ । एनआरएन लघुवित्तले यसअघि पनि रामारोशन लघुवित्त र क्रियटिभ लघुवित्तलाई मर्ज गरी विसं २०७६ साल भदौ २४ गतेबाट एकीकृत कारोबार गरेको थियो ।
हाल एनआरएन लघुवित्तको चुक्तापूँजी रू.३१ करोड रहेको छ । त्यस्तै किसान लघुवित्तको रू.११ करोड २४ लाख भन्दा माथि रहेको छ । दिब्य लघुवित्तको रू.७ करोड ७० लाख रहेको छ ।
मर्जरपछि रू.५० करोड भन्दा बढी चुक्तापूँजी पुग्ने उक्त कम्पनीले तत्कालै हकप्रद शेयर तथा फर्दर पब्लिक अफरिङ (एफपीओ) जारी गर्ने पनि सम्झौतामा उल्लेख छ ।
२०७६ माघ ०५ गते प्रकाशित
वि.सं.२०७६ माघ ५ आइतवार ०९:३२ मा प्रकाशित
