काठमाडौ । लघुवित्त वित्तीय संस्थाहरु पछिल्लो पटक मर्जरमा जाने लहर तिव्र रुपमा चलिरहेको छ । यसैक्रममा बुधवार १५ जिल्ला कार्यक्षेत्र रहेको महुली लघुवित्त र सर्वसाधारणका लागि हालसम्म शेयर नै जारी नगरेको नवकिरण लघुवित्त वित्तीय संस्थावीच मर्जरमा जाने सहमति भएको छ ।
सप्तरी जिल्लाको अग्निसाइर कृष्णसवरण नगरपालिका –६मा केन्द्रीय कार्यालय रहेको महुली लघुवित्त र काभ्रेपलाञ्चोक जिल्ला धुलिखेल–६ मा केन्द्रीय कार्यालय रहेको नवकिरण लघुवित्तले मर्जमा जान सम्झौता गरेका हुन् ।
सम्झौतापत्रमा महुली लघुवित्तका अध्यक्ष प्रभुनारायण चौधरी र नवकिरण लघुवित्तका अध्यक्ष मोहनहरि आचार्यले हस्ताक्षर गरेका छन् ।
दुवै लघुवित्त आपसमा गाभिएपछि संस्थाको नाम महुली लघुवित्त वित्तीय संस्था रहने र केन्द्रीय कार्यालय हाल महुलीको केन्द्रीय कार्यालय रहेको सप्तरीको अग्निसाइर कृष्णसवरण गाउँपालिकाको महुलीमै रहने सम्झौतामा उल्लेख छ ।
दुवै लघुवित्तले मर्जर प्रक्रिया बैशाख महीनासम्ममा सम्पन्न गरेर एकीकृत कारोबार शुरु गर्ने महुली लघुवित्तले बताएको छ ।
सम्झौतामा दुवै लघुवित्तको सेयर स्वाप अनुपात १०० स् ९५ नघट्ने गरी कायम गर्ने उल्लेख छ । अर्थात नवकिरण लघुवित्तको १०० कित्ता सेयर रहेका शेयरधनीले मर्जरपछि बन्ने महुली लघुवित्तको ९५ कित्ता सेयर पाउनेछन् ।
साथै महुली लघुवित्तले मर्जर प्रक्रिया पुरा नहुन्जेलसम्मका लागि शेयर खरीदविक्री बन्द गर्न नेपाल स्टक एक्सचेञ्ज(नेप्से) र अन्य नियामक निकायलाई भनेको छ ।
२०७६ माघ ०८ गते प्रकाशित
वि.सं.२०७६ माघ ८ बुधवार १६:३४ मा प्रकाशित