काठमाडौं । बागमती प्रदेशका ज्येष्ठ पत्रकारले पेन्सन पाउने भएका छन् । आन्तरिक मामिला तथा कानुन मन्त्रालयअन्तर्गत रहेको बाग्मती प्रदेश सञ्चार रजिष्ट्रारको कार्यालयले यस्तो व्यवस्था गर्ने भएको हो ।
कार्यालयले ३० वर्ष पत्रकारिता गरेका र ६० वर्ष उमेर पुगेका पत्रकारलाई पेन्सनको व्यवस्था गरिने जनाएको छ । सञ्चार रजिष्ट्रार रेवती सापकोटाले प्रदेश सञ्चारमाध्यम व्यवस्थापन ऐन र नियमावलीमा भएको व्यवस्था अनुसार ज्येष्ठ पत्रकार पेन्सनका रुपमा मासिक ३ हजार रुपैयाँ उपलब्ध गराउने जानकारी दिनुभयो ।
संघीय सरकार मन्त्रिपरिषद्ले पनि २०७५ चैतमा ज्येष्ठ पत्रकारलाई पेन्सन दिने निर्णय गरेको थियो तर उक्त निर्णय हालसम्म कार्यान्वयनमा आएको छैन् । नयाँ पत्रिकाले समाचार छापेको छ ।
राज्यबाट उपलब्ध हुने अन्य कुनै सामाजिक सुरक्षा भत्ता वा नेपाल सरकार, प्रदेश सरकार र स्थानीय तहबाट आर्थिक सुविधा प्राप्त हुने सार्वजनिक पदमा बहाल रहने ज्येष्ठ पत्रकारले भने मासिक पेन्सन नपाउने व्यवस्था रहेको सापकोटाले बताउनुभयो ।
सञ्चार रजिष्ट्रारको कार्यालयले तयार पारेको कार्यविधिमा पत्रकार कल्याण कोषबाट पत्रकारिताको सिलसिलामा दुर्घटनामा परेमा क्षतिको मूल्यांकनका आधारमा बढीमा ३० हजार रुपैयाँसम्म सहयोग दिइने उल्लेख छ ।
दुर्घटनाको कारणले उपचारको निम्ति अस्पतालमा भर्ना भएको १२ घण्टापछि मृत्यु भएमा थप ४० हजार रुपैयाँ, दुर्घटनामा परी घटनास्थलमै मृत्यु भएमा ५० हजार रुपैयाँ उपलब्ध गराइने कार्यालयले जनाएको छ ।
मृगौला, क्यान्सरजस्ता घातक रोग लागेका पत्रकारलाई औषधि उपचार गर्न ७५ हजार रुपैयाँसम्म आर्थिक सहयोग गर्न सकिने सञ्चार रजिष्ट्रार सापकोटाले जानकारी दिनुभयो ।
सञ्चार रजिष्ट्रार कार्यालयले सुत्केरी महिला पत्रकारलाई प्रसुती भएको एक वर्ष अवधिसम्म आत्मनिर्भरता र सिर्जनात्मक प्रवर्द्धनका लागि लेखन तथा प्रसारणवृत्ति दिने जनाएको छ । प्रसुती भएको एक वर्षसम्म पत्रकारितामा क्रियाशिल बनाई राख्ने उद्देश्यले लेखन तथा प्रसारणवृत्ति प्रदान गर्न लागिएको कार्यालयले जनाएको छ ।
सुत्केरी अवधिमा महिला पत्रकारलाई बढीमा चार वटासम्म विषयगत लेखन र प्रसारण गर्ने अवसर प्रदान गर्ने सञ्चार रजिष्ट्रार सापकोटाले जानकारी दिनुभयो । एउटा लेखन तथा प्रसारण वृत्तिबापत २० हजार रुपैयाँसम्म उपलब्ध गराइने उहाँले बताउनुभयो ।
वि.सं.२०७६ माघ २५ शनिवार ०९:१० मा प्रकाशित