काठमाडौं । हिमाल दोलखाको आईपीओ नेपाल स्टक एक्सचेञ्ज (नेप्से)मा सूचीकृत भएको छ । कम्पनीले सोमवार १ करोड ६० लाख कित्ता आईपीओ सूचीकृत गराएको हो ।
मंगलवारदेखि कारोबार गर्न सकिने यस कम्पनीको शेयरको पहिलो कारोबारका लागि नेप्सेले रू. ६५ दशमलव ३३ देखि रू. १९५ दशमलव ९९ मूल्य रेञ्ज तोकेको छ ।
आयोजना प्रभावित र स्थानियलाई शेयर जारी गरी रू. १ अर्ब ६० करोड चुक्तापूँजी र्पुयाएको कम्पनीले उक्त शेयर कारोबारका लागि सूचीकृत गराएको हो । आयोजना प्रभावित स्थानियको हकमा भने तीन वर्षे लकइन अवधि लागू हुनेछ ।
यस कम्पनीले आयोजना प्रभावित स्थानियका लागि २०७६ जेठ १४ देखि असार १३ गतेसम्म १६ लाख कित्ता आईपीओ विक्री खुला गरी असार १६ गते बाँडफाँट गरेको थियो । बाँडफाँट भएको मितिले तीन वर्षसम्म स्थानियको शेयर भने खरीदविक्री हुने छैन ।
सर्वसाधारणका लागि भने कम्पनीले गत भदौ ५ गते शेयर बाँडफाँट गरेको थियो । कम्पनीले सर्वसाधारणका लागि छुट्याएको कुल ७६ लाख ७२ हजार २१० कित्ता शेयरमध्ये १ लाख ५३ हजार ४४४ कित्ता शेयर कर्मचारीलाई सुरक्षित गरी २५ हजार कित्ता म्युचुअल फण्डहरूलाई बाँडफाँटपछि बाँकी रहेको ७४ लाख ९३ हजार ७६६ कित्ता शेयर सर्वसाधारणलाई विक्री खुला गरेको थियो ।
सर्वसाधारण र स्थानियलाई वितरण गर्न नसकिएको १४ लाख ७२ हजार २१० कित्ता शेयर समेत जोडेर विक्री खुला गरिएको हो ।सर्वसाधारणलाई ३० लाख ९३ हजार २५० कित्ता मात्र बाँडफाँट गरिएको थियो ।
सर्वसाधारणले खरीद नगरेको शेयर सकार्ने प्रत्याभूतकर्ताहरुले नै सकार्न नमान्दा कम्पनीको आईपीओ सूूचीकरणमा ढिलाइ भएको हो । यस कम्पनीमा संस्थापकतर्फ ५१ दशमलव २५, स्थानियतर्फ १० र सर्वसाधारणतर्फ ३८ दशमलव ७५ प्रतिशत शेयर स्वामित्व रहेको छ ।
कम्पनीले इलाममा ४ दशमलव ५ मेगावाटको माईखोला साना जलविद्युत् आयोजना र ८ मेगावाटको माई साना क्यास्केड जलविद्युत् आयोजना निर्माण गरि व्यापारिक उत्पादन गरिरहेको छ ।
माईखोला साना जलविद्युत अयोजनाबाट वार्षिक २ करोड ७५ लाख ३० हजार १५९ किलोवाट घण्टा विद्युत् उत्पादन तथा विक्री गरिने र माई साना क्यास्केड जलविद्युत् आयोजनाबाट वार्षिक ४ करोड ८३ लाख ५१ हजार २५५ किलोवाट घण्टा विद्युत् उत्पादन तथा विक्री गर्ने गरि नेपाल विद्युत् प्राधिकरणसँग सम्झौता भएको छ ।
वि.सं.२०७६ फागुन १२ सोमवार १५:४२ मा प्रकाशित
