काठमाडौं– धितोपत्रको दोस्रो बजार नेपाल स्टक एक्सचेन्जमा सेयर किनबेच हुने समय थप भएको छ । स्टकले आइतबारदेखि परीक्षणका लागि भन्दै सेयर कारोबार अवधि दैनिक एकघन्टा थपेको हो ।
अब दोस्रो बजारमा दैनिक पाँच घन्टा सेयर किनबेच हुने स्टक एक्सचेन्जले जानकारी गराएको छ ।
स्टकका प्रमुख कार्यकारी अधिृकत चन्द्रसिंह साउदका अनुसार विहान ११ बजे सुरु हुने कारोबार ४ बजेसम्म चल्नेछ । यसअघि ११ देखि ३ बजेसम्म सेयर किनबेच हुन्थ्यो । सेयर किनबेच हुने दिन भने आइतबारदेखि बिहीबारसम्म नै कायम छ ।
स्टकले नेपाल धितोपत्र बोर्डको निर्देशन अनुसार कारोबार समय थपेको हो । बोर्डले सेयर कारोबार समय थप गर्ने विषयमा अध्ययन गर्न केही दिनअघि स्टकलाई निर्देशन दिएको थियो । बोर्डको निर्देशन अनुसार शुक्रबार बसेको नेप्से सञ्चालक समिति बैठकले परीक्षणका रुपमा कारोबार समय थप गरेको हो ।
परीक्षण अवधिमा अरु बेलाझैं कारोबार भए निरन्तरता दिने निर्णय भएको छ । स्टक एक्सचेन्जले १०ः३० देखि ११ बजेसम्म प्रारम्भिक कारोबार समय हुने, ११ देखि ४ बजेसम्म कारोबार समय हुने र ४ देखि ४ः०५ सम्म अन्तिम कारोबारका लागि भनेर समय तोकेको छ ।
वि.सं.२०७६ चैत २ आइतवार १५:२३ मा प्रकाशित