काठमाडौं । बहुपक्षीय कर्जादाता निकाय विश्व बैंकले विश्वभर महामारीको रुपमा फैलिएको कोरोना भाइरसविरुद्धको लडाईका लागि थप २ अर्ब डलर दिने भएको छ ।
बैंकले महामारीबाट उत्पन्न वित्तिय तथा आर्थिक संकटको प्रभाव न्यूनीकरण गर्न भनेर यस अघि उपलब्ध गराएको फाष्ट–ट्र्याक वित्तीय प्याकेजमा २ अर्ब डलर थपेर १४ अर्ब डलर पु¥याएको हो ।
योसँगै भाइरसको आर्थिक प्रभावका कारण मारमा परेको निजी कम्पनी र तिनका कर्मचारीहरुलाई टेवा दिन बैंकको अन्तरराष्ट्रिय वित्तीय कर्पोरेशन (आईएफसी)ले दिने भनेको आर्थिक सहायता यस अघिको ६ अर्ब डलरबाट बढेर ८ अर्ब डलरमा पुगेको छ ।
यीमध्ये अधिकांश रकम व्यापारको लागि आवश्यक रकम उपलब्ध गराउन, आपूर्ति शृङ्खलामा आएको अवरोधका कारण संघर्ष गरिरहेका निजी कम्पनीहरुलाई चलाइराख्न आवश्यक पूँजी र मध्यकालीन वित्तका रुपमा उपलब्ध गराउन वित्तीय संस्थाहरुले प्रयोग गर्ने बैंकको भनाइ छ।
प्याकेजले पयर्टन, म्यानुफ्याक्चरिङ लगायत महामारीको चपेटामा आएका विधि क्षेत्रका विद्यमान ग्राहकलाई तिर्नु पर्ने महसुल भुक्तानीमा मद्दत गर्नेछ । यसबाट केही रकम सेवा, उपकरण र औषधिलगायत वस्तुको उच्च माग धान्न भ्याइनभ्याइ भइरहेको स्वास्थ्य सेवा उद्योगलाई पनि सहायता मिल्ने बताइएको छ ।
विकाशोन्मुख देशहरुको आवश्यकताका आधारमा छिटो र लचिलो भएर प्रतिक्रिया देखाउन बैंक प्रतिबद्ध रहेको बैंकका अध्यक्ष डेभिड मलपासले बताएका छन् ।
टेवा दिने खालका कार्यक्रम चलिरहेको र अर्थतन्त्र, कम्पनी एवम् रोजगारीलाई टिकाउन मद्दत मिलोस् भनेर ‘फण्डिङ टूल’ विस्तार गरिएको समेत उनले बताए । विश्वभर भाइरस संक्रमितको संख्या २ लाख नाघेको छ भने मर्नेको संख्या पनि ८ हजार माथि उक्लिएको छ । –एजेन्सी
वि.सं.२०७६ चैत ५ बुधवार २०:५७ मा प्रकाशित