काठमाडौं । कोरोना संक्रमणका कारण खाद्यान्नको आयात कम भएको भन्दै सरकारले नै खाद्यान्न विक्री गर्ने भएको छ । व्यापारीहरुले चरम कालोबजारी गरेका कारण बजारमा दैनिक उपभोग्य वस्तुहरुको अभाव हुन नदिन सरकारले विभिन्न पाँच स्थानबाट दैनिक उपभोग्य वस्तुहरु विक्रि गर्न लागेको हो ।
बजारमा कालोबजारी बढेपछि सहुलियत दरका खाद्यान्न उपलब्ध गराउन लागेको नियमित पत्रकार सम्मेलनमा उद्योग वाणिज्य तथा आपूर्तिमन्त्री लेखराज भट्टले जानकारी दिएका हुन् ।
सो पत्रकार सम्मेलनमा मन्त्री भट्टले आयात नियमित रुपमा भएपनि उपभोक्ताले आवश्यकता भन्दा बढी खरिद गरिरहेकाले अभाव देखिएको बताए । उपत्यकामा समस्या देखिए पनि उपत्यका बाहिर त्यति समस्या नदेखिएको उनको भनाइ थियो ।
अहिले व्यापारीहरुले दैनिक उपभोग्य वस्तु दाल, चामल, खानेतेल, ग्याँस, मास्क तथा तरकारी लगायतका वस्तुमा चर्काे कालोबजारी गरिरहेका छन् ।
सरकारसँग ६ महिनालाई पुग्ने खाद्यान्न, ८ महिनालाई पुग्ने औषधी, १० महिनालाई पुग्ने नुन तथा ३ महिनालाई पुग्ने चिनीको मौज्याद रहेको मन्त्री भट्टले बताए ।
वि.सं.२०७६ चैत ६ बिहीवार १८:०३ मा प्रकाशित
