काठमाडौं । प्रदेश नम्बर १ सरकारले कोभिड–१९ नियन्त्रण तथा रोकथाम गर्न १० करोडको कोष खडा गरेको छ । मंगलवार बसेको मन्त्रिपरिषद् बैठकले ‘प्रदेश नम्बर १ कोरोना जनसुरक्षा कोष’ खडा गरी उक्त कोषमा प्रदेश सरकारका तर्फबाट १० करोड रकम जम्मा गरेको हो ।
मुख्यमन्त्री शेरधन राईका प्रेस संयोजक ध्रुव सुवेदीका अनुसार उक्त कोषमा मुख्यमन्त्रीसहित मन्त्री र राज्यमन्त्रीहरूले एक महिनाको पारिश्रमिक जम्मा गर्ने निर्णय पनि बैठकले गरेको छ ।
बैठकले मुख्यमन्त्री तथा मन्त्रिपरिषद् कार्यालयमा कोरोना इन्फर्मेसन डेस्क स्थापना गर्ने निर्णय गरेको छ । साथै सबै मन्त्रालयमा अधिकृतस्तरका एक कर्मचारीलाई कोरोना फोकल पर्सन तोकी प्रत्येक दिन इन्फर्मेसन डेस्कमा कोरोना सम्बन्धी सूचनाहरु उपलब्ध गराइने छ।
वि.सं.२०७६ चैत ११ मंगलवार १९:४८ मा प्रकाशित