काठमाडौं । नेपालमा कोरोना भाइरस (कोभिड-१९) संक्रमितको संख्या २१९ पुगेको छ । स्वास्थ्य तथा जनसंख्या मन्त्रालयका प्रवक्ता डा. विकास देवकोटाका अनुसार बुधबार दुई जनाको रिपोर्ट पोजिटिभ आएसँगै संक्रमितको संख्या २१९ पुगेको हो ।
बुधबार बाँकेका ३६ वर्षीय र कपिलवस्तुका २२ वर्षीय पुरुषमा कोरोना पोजिटिभ देखिएको हो। धुलिखेल अस्पताल र राष्ट्रिय जनस्वास्थ्य प्रयोगशालाका काठमाडौंमा उनीहरुको नमुना परीक्षण गरिएको थियो।
अहिलेसम्म कर्णालीबाहेक ६ प्रदेशका ३१ जिल्लामा कोरोना संक्रमण पुष्टि भएको छ । प्रदेश १ मा झापा, भोजपुर र उदयपुर जिल्लामा संक्रमण देखिएको छ। प्रदेश १ मा कुल संक्रमितको संख्या ३५ छ ।
प्रदेश २ मा संक्रमितको संख्या सबैभन्दा बढी ९६ छ। प्रदेश २ का सप्तरी, धनुषा, महोत्तरी, सर्लाही, बारा, पर्सा र रौतहटमा संक्रमण पुष्टि भएको हो ।
त्यसैगरी बागमती प्रदेशमा ९ जनामा कोरोना पुष्टि भएको छ। यसरी पुष्टि हुने काठमाडौं, भक्तपुर, धादिङ र चितवन जिल्लाका छन् । सँगै गण्डकी प्रदेशमा २ जनामा कोरोना पोजिटिभ देखिएको छ । उनीहरु बागलुङ जिल्लाका हुन् ।
त्यसैगरी प्रदेश ५ का कपिलवस्तु, रुपन्देही, बाँके र बर्दिया गरेर चार जिल्लाका ७२ व्यक्ति संक्रमित छन् भने सुदूरपश्चिम प्रदेशका कैलाली र कञ्चनपुर गरेर दुई जिल्लाका संक्रमितको संख्या १९ रहेको छ ।
नेपालमा कुल २१९ जनामा कोरोना पुष्टि हुँदा १७६ पुरुष र ४३ महिला छन्। त्यसैगरी बुधबार दुई जनाले कोरोना जितेका छन् । योसँगै डिस्चार्ज हुनेको संख्या ३५ पुगेको छ ।
आजै बुधबार बुटवलमा उपचार गराइरहेका २५ वर्षीय पुरुष ११ दिनमा र चितवनमा २६ दिनदेखि उपचार गराइरहेकी ६३ वर्षीय महिला डिस्चार्ज भएकी हुन्।
वि.सं.२०७७ वैशाख ३१ बुधवार १७:१६ मा प्रकाशित
