काठमाडौं । सरकारले भोलिदेखि लकडाउन थप कडा बनाउने भएको छ । काठमाडौं उपत्यकामा कोरोना भाइरस संक्रमितको संख्या बढ्न थालेपछि लकडाउन कडा बनाउने भएको हो ।
गृह मन्त्रालयले बिहीबार उपत्यकाका तीन जिल्ला काठमाडौं, भक्तपुर, ललितपुरका प्रमुख जिल्ला अधिकारी, मेयरहरू, प्रहरी अधिकारीहरूसँगको छलफलपछि लकडाउन कसिलो बनाउने निष्कर्ष निकालेको हो ।
शुक्रवारदेखि आवातजावातको चेकिङमा थप कडाइ गरिने बताइएको छ । अब उपत्यका भित्रने र बाहिरिने नाकामा थप कडाइ गरिने छ । नगरपालिकाका मेयरहरूले भने भित्री सडकमा पनि जाँचमा कडाइ गर्न सुझाएका छन् ।
आवागमन रोक्नकै लागि गृह मन्त्रालयले सबै खाले पास रद्द गरिसकेको छ । जिल्लामा पास दिनुपर्दा प्रजिअहरूले गृहकै समन्वयमा पास उपलब्ध गराउनुपर्ने निर्देशन गृहले दिएको हो ।
काठमाडौंमा लकडाउन नै नरहेको भन्दै प्रधानमन्त्रीले कडा गर्न आदेश दिएलगत्तै गृह मन्त्रालयले सुरक्षा निकायका प्रमुख र नागरपालिकाका मेयरहरुलाई बोलाएर कडा पार्न लागेको हो ।
वि.सं.२०७७ जेठ १ बिहीवार १७:०६ मा प्रकाशित
