काठमाडौं । नेपालको संविधान संशोधन विधेयक संघीय संसद सचिवालयमा दर्ता भएको छ। सोमबार राष्ट्रिय जनता पार्टी (राजपा) र समाजवादी पार्टी ले संविधान संशोधन प्रस्ताव दर्ता गरेका हुन् ।
गैरसरकारी विधेयकको रुपमा दर्ता भएको संविधान संशोधनको प्रस्तुतकर्ता राजपाका लक्ष्मणलाल कर्ण र समाजवादीका राजेन्द्रप्रसाद श्रेष्ठका छन् ।
सोमबार संशोधन विधेयक दर्ता गर्न राजपाका अध्यक्ष मण्डलका सदस्य महिन्द्रराय यादवलगायत नेताहरू संसद सचिवालय सिंहदरबार पुगेका थिए ।
सभामुखको अनुपस्थितिमा सभामुखले गर्ने सबै काम उपसभामुखले गर्नुपर्ने, प्रधानमन्त्री, मन्त्रिपरिषद्लगायतसँग जोडिएका आर्थिक अपचलनका मुद्दा हेर्न शक्तिशाली लोकपाल गठन गर्नुपर्ने, सर्वोच्च अदालतको संवैधानिक इजलासले प्रभावकारी काम नगरेको भन्दै संविधान संशोधन गरेर संवैधानिक अदालत गठन गर्नुपर्ने र राजदूत लगायत संवैधानिक नियुक्त समावेशी र समानुपातिक हुनुपर्ने माग छ।
शुक्रबार गैरसरकारी विधेयकका रूपमा संविधान संशोधन विधेयक दर्ता गर्न संसद सचिवालयले अस्वीकार गरेको थियो। राजपाका नेताहरू महन्थ ठाकुर, राजेन्द्र महतो, महेन्द्र राय यादव, अनिल झालगायत नेताहरू संविधान संशोधन विधेयक दर्ता गर्न संसद सचिवालय पुगेका थिए। संविधान संशोधन विधेयक भाषा, वैवाहिक अंगीकृत नागरिकता, प्रदेश सीमांकन र राष्ट्रियसभामा प्रतिनिधि छान्ने विषय समावेश छ ।
अन्न्पूर्णपोष्टबाट
वि.सं.२०७७ जेठ १९ सोमवार १८:४५ मा प्रकाशित