काठमाडौं । एकै परिवारका १४ जनासहित २२ जनामा कोरोना संक्रमण पुष्टि भएपछि मोरङको रङ्गेली नगरपालिका सोमबार राति १२ बजेदेखि अनिश्चितकालका लागि शिल गरिएको छ ।
एकै परिवारका १४ जनासहित २२ जनामा कोरोना देखिएको सोमबार राति १२ बजेदेखि अर्को सूचना जारी नभएसम्मका लागि नगर क्षेत्र शिल गरिएको नगरपालिकाका प्रमुख प्रशासकीय अधिकृत टोमप्रसाद सुवेदीले जानकारी दिए ।
१४ जना संक्रमित भेटिएको परिवारमा एक महिला (छोरी) भारतबाट आएको र उनकै कारण संक्रमण फैलिएको् हुनसक्ने उनले अनुमान गरे ।
वुबा बिरामी परेपछि ती युवती भेट्नका लागि दिल्लीबाट नेपाल आएकी थिइन् ।
पछि ती बृद्धको मृत्यु भएको र उनको अन्तिम संस्कारमा सहभागी भएका परिवारका सदस्य र केही गाउँलेमा पनि कोरोना देखिएको प्रमुख प्रशासकीय अधिकृत सुवेदीले भने ।
‘संक्रमितहरु धेरै जनाको सम्पर्कमा आएका कारण उहाँहरुको सम्पर्कमा आएकाहरुको पनि स्वाब संकलन गरी परीक्षण भइरहेको छ’, सुवेदीले भने, ‘उहाँहरुको रिपोर्ट आएपछि कति समय शिल गर्ने भन्नेबारेमा फेरि छलफल गर्नेछौं ।’
वि.सं.२०७७ साउन २० मंगलवार १२:३४ मा प्रकाशित
