काठमाडौं । काठमाडौं उपत्यकासहित देशभर कोरोना भाइरसको जोखिम बढेसँगै प्रधानमन्त्री केपी शर्मा ओलीले जनस्वास्थ्य विज्ञ र सरोकारवालाहरुसँग छलफल गरेका छन् ।
मंगलबार प्रधानमन्त्रीको सरकारी निवास बालुवाटारमा भएको छलफलमा विज्ञहरुले दुई हप्ता लकडाउन बढाउनेदेखि कर्फ्यु लगाउनुपर्नेसम्मका सुझाव दिएका छन ।
जनस्वास्थ्य विज्ञ डा. रविन्द्र पाण्डेले समुदायस्तरमै एक व्यक्तिबाट अर्को व्यक्तिमा संक्रमण फैलिने दर बढेकाले १५ दिन कडा खालको लकडाउन गर्नुपर्ने सुझाव दिएको जानकारी दिए । सुरुमा भारत लगायत तेस्रो मुलुकबाट आउनेहरुमा संक्रमण देखिने गरेकोमा पछिल्लो समय नेपालमै बस्ने व्यक्तिमा संक्रमण फैलिरहेकाले १५ दिन कडा लकडाउन गरी स्वास्थ्य सुरक्षाका मापदण्ड कडाईका साथ अपनाउने गरी अगाडि बढ्नुपर्ने उनको भनाइ छ ।
त्यस्तै केही विज्ञहरुले लकडाउन मात्रै महामारी नियन्त्रणको एकमात्रै उपाय नभएकोले संक्रमण देखिएका निश्चित ठाउँहरु मात्र सिलबन्दी गरी सीमा नाकामा कडाई गर्नुपर्ने सुझाव दिएका छन । जनस्वास्थ्य विज्ञ डा. समिरमणि दिक्षितले लकडाउन गरेर कोरोना पूर्ण रुपमा नियन्त्रणमा नआउने भएकाले बढी संक्रमण फैलिएको क्षेत्रमा मात्र कडाई गर्नुपर्ने सुझाव दिएका छन् । स्वास्थ्य सुरक्षाका मापदण्ड नअपनाए अवस्था भयावह हुने उल्लेख गर्दै उनले सबैको सल्लाह सुझावअनुसार प्रधानमन्त्रीले उचित निर्णय लिने विश्वास व्यक्त समते गरे ।
प्रधानमन्त्रीका प्रेस सल्लाहका सूर्य थापाकाअनुसार विज्ञहरुसँगको छलफलपछि प्रधानमन्त्री ओलीले स्वास्थ्य मन्त्रालय, सीसीएमसी र मन्त्रिपरिषद्मा छलफल गरेर आगामी कदम चाल्ने प्रतिवद्धता जनाएका छन् । विज्ञसँगको छलफलमा नेताहरु शेरबहादुर देउवा, महन्थ ठाकुर, राष्ट्रिय योजना आयोगका पूर्व उपाध्यक्ष लगायतको सहभागिता रहेको थियो ।
वि.सं.२०७७ साउन २० मंगलवार १८:०४ मा प्रकाशित