सुर्खेत । जिल्ला प्रशासन कार्यालय सुर्खेतले अत्यावश्यक बाहेकका सेवा बन्द गरेको छ । बिहीबार सूचना जारी गर्दै कार्यालयले अत्यावश्यक बाहेकका सेवा अर्को सूचना जारी नभए सम्मका लागि बन्द गरिएको जानकारी दिएको हो।
साउन २५ गतेदेखि लागू हुनेगरी नागरिकता, राहदानी सिफारिस, संघसंस्था दर्ता तथा नविकरणसँगै अन्य सेवा बन्द गरिएको प्रशासनले जनाएको छ।सुर्खेतमा समेत कोरोना संक्रमितको दर नघटेकोले संक्रमण जोखिमलाई मध्यनजर गर्दै सेवा बन्द गरिएको कार्यालयले जनाएको छ।
जिल्लामा साउन २० गतेदेखि जिल्ला कोरोना संकट व्यवस्थापन केन्द्रको निर्णय अनुसार सभा, गोष्ठी, तालिम, जात्रा, महोत्सव गर्न रोक लगाइएको थियो।
कार्यालयहरूमा अत्यधिक रूपमा सेवाग्राहीको भीड लाग्न थालेपछि जोखिमलाई मध्यनजर गर्दै अत्यावश्यक बाहेकका सेवा बन्द गरिएको जिल्ला प्रशासन कार्यालयका प्रशासकीय अधिकृत पदमलाल लामिछानेले जानकारी दिए।
वि.सं.२०७७ साउन २२ बिहीवार १७:१९ मा प्रकाशित
