पोखरा । पोखरा महानगरपालिकाले सोमबार मध्यरातदेखि नै महानगरमा निषेधाज्ञा जारी गर्न भने पनि प्रदेशको कोभिड-१९ संकट व्यवस्थापन केन्द्र (सिसिएमसी) बैठक पश्चात एकदिन पछि अर्थात मंगलबार मध्यरातदेखि कास्की जिल्लामा निषेधाज्ञा जारी हुने भएको छ ।
मंगलबार बिहान जिल्ला स्थित कोरोना न्यूनीकरण तथा र व्यवस्थापन समिति (डीसीसीएमसी) को बैठक बस्ने र निषेधाज्ञासम्बन्धी निर्णय हुने जिल्ला प्रशासन कार्यालय कास्कीका सहायक प्रमुख जिल्ला अधिकारी श्रीनाथ पौडेलले जानकारी दिए ।
यसअघि सोमबार बिहान महानगरपालिकामा राजनीतिक दलसहित बसेको कोरोना रोकथाम समितिको बैठकले सोमबार रातीदेखि नै लकडाउन गर्ने निर्णय गरि सो प्रस्ताव प्रदेशस्तरीय कोभिड व्यवस्थापन केन्द्रमा मेयर मानबहादुर जिसीले प्रस्ताव गरेका थिए ।
“हामीले सोमबार रातिदेखि नै महानगरमा निषेधाज्ञा जारी गर्ने प्रस्ताव लगेका थियौं, तर भोलि बिहान डीसीसीएमसी बैठक बस्ने र कास्की नै पाँच दिनको लागि निषेधाज्ञा जारी गर्ने भन्ने भएको छ । त्यसकारण मंगलबार रातीदेखि लकडाउन हुन्छ,” उनले भने ।
तर, प्रदेशस्तरीय समितिले महानगरको बारेमा ठोस निर्णय गरेन । उक्त निर्णय कार्यान्वयन गर्न जिल्ला प्रशासन कार्यालयलाई जिम्मा दिइएको छ । भोलि बिहान बस्ने डीसीसीएमसीको बैठकले महानगरमात्रै नभई कास्की जिल्लामा नै ५ दिनसम्म निषेधाज्ञा जारी गर्ने निर्णय हुने सम्भावना रहेको पौडेलले जानकारी दिए । बाह्रखरीबाट
वि.सं.२०७७ भदौ १ सोमवार १९:३३ मा प्रकाशित
