रौतहट । जिल्ला प्रशासन कार्यालय रौतहटले कोरोना संक्रमण जोखिम रोकथामका लागि आइतबारबाट थप एक साता निषेधाज्ञाको समय बढाएको छ । साउन २४ गतेदेखि जारी निषेधाको समय आइतबार सकिन्थ्यो । प्रशासनले भदौ १४ गतेसम्म निषेधाज्ञा थप गरेको छ ।
यसअघि प्रशासनले निषेधाज्ञा भदौ ७ गतेसम्मका लागि जारी गरेको थियो । प्रमुख जिल्ला अधिकारी इन्द्रदेव यादवले निषेधाज्ञा एक साताका लागि थप गरिएको बताए ।
जिल्लास्तरीय कोभिड–१९ संकट व्यवस्थापन केन्द्रको बैठकले निषेधाज्ञालाई १४ गतेसम्म निरन्तरता दिने निर्णय गरेको प्रजिअ यादवले जानकारी दिए । ‘अझै केही समय मानिसको भीडभाड र हिँडडुल रोक्नु पर्छ,’ उनले भने, ‘संक्रमितको संख्या बढीरहेको अवस्थामा निषेधाज्ञालाई निरन्तरता दिनुपर्ने अवस्था छ ।’
निषेधाज्ञाको अवधिमा अत्यावश्यक उपभोग्य खाद्यान्न सामग्रीको आपूर्तिलाई सहज बनाउन खाद्यान्न र निर्माण सामग्रीका पसल बिहान ७ बजेदेखि ११ बजेसम्म स्वास्थ्य सुरक्षा अपनाएर खोल्न दिने निर्णय भएको जिल्ला प्रशासनले जनायो ।
पसलहरु खोल्दा उपभोक्ता र सञ्चालकले कोरोना सुरक्षा विधिहरु कडाइका साथ पालना गरिनुपर्ने निर्णय भएको प्रशासकिय अधिकृत किरणनिधि तिवारीले बताए । निषेधाज्ञाको अवधिमा जिल्लाभरि बैंक तथा वित्तिय संस्थालाई पनि बिहान ७ बजेदेखि बिहान ११ बजेसम्म सञ्चालन गर्न दिइने निर्णय भएको छ ।
जिल्लामा अहिलेसम्म १ हजार ५ सय १५ जनामा कोरोना पुष्टि भइसकेको छ । तीमध्ये १ हजार ३ सय ६४ जना कोरोना जितेर घर फर्किसकेका छन् । अहिले १ सय १० जना संक्रमित आइसोलेसनमा उपचारको क्रममा रहेको प्रशासनले जनायो । भारतलगायत बाहिरी देशबाट फर्केका १ सय ११ जना क्वारेन्टाइनमा बसेका छन् ।कान्तिपुर अनलाइनबाट
वि.सं.२०७७ भदौ ७ आइतवार ११:०१ मा प्रकाशित